आकोला, २५ नोव्हेंबर (डॉ. मोहम्मद राघिब देशमुख यांचा अहवाल)— शहरातील आकोट फेल भागात सोमवारी सकाळी घडलेल्या एका हृदय पिळवटून टाकणाऱ्या घटनेने संपूर्ण शहर हादरले आहे. पत्नीच्या चारित्र्यावर संशय आणि सतत सुरू असलेल्या कौटुंबिक वादामुळे संतापलेल्या पतीने स्वतःच्या पत्नीचा धारदार सुरीने गळा चिरून खून केला. दोघांमधील घटस्फोटाचा अर्ज न्यायालयात सुरू होता; मात्र तरीही ते एकाच घरात राहत होते आणि नेहमीच त्यांच्यातून भांडणे होत असत. सोमवारी सकाळी झालेल्या वादाला उग्र रूप आले आणि रागाच्या भरात पतीने पत्नीचा जीव घेतला. या रक्तरंजित घटनेने आकोला शहरात खळबळ उडाली आहे. आकोट फेल पोलिसांनी आरोपी पतीला अटक केली आहे.
मिळालेल्या माहितीनुसार, आकोट फेल पोलीस स्टेशन हद्दीतील राजू नगर येथे राहणारे शेख राजू शेख निजाम (वय ४१) आणि त्यांची पत्नी शेख शमीम शेख राजू (वय ३६) यांच्यात बराच काळापासून कौटुंबिक वाद सुरू होते. पतीला पत्नीच्या चरित्रावर संशय असल्यामुळे दोघांमध्ये सतत भांडणे होत असत. याच कारणावरून दोघांनी न्यायालयात विभक्त राहण्याचा अर्जही दाखल केला होता. घटस्फोटाची प्रक्रिया सुरू असतानाही ते दोघे एकत्र राहत होते आणि दररोज वाद होत होते.
सोमवारी सकाळीही शेख राजू यांनी पत्नीच्या चरित्राविषयी संशय व्यक्त करत वाद सुरु केला. वाद वाढत जाऊन तीव्र भांडण झाले आणि परिस्थिती इतकी बिघडली की शेख राजूंनी संतापाच्या भरात घरातील धारदार सुरी उचलून पत्नी शेख शमीम यांच्या गळ्यावर वार केले. गंभीर जखमी शमीम यांना स्थानिक नागरिकांनी तातडीने शासकीय रुग्णालयात दाखल केले; परंतु उपचारादरम्यान त्यांचा मृत्यू झाला.
घटनेची माहिती मिळताच आकोट फेल पोलिसांनी घटनास्थळी पोहोचून पाहणी केली तसेच आरोपी शेख राजू शेख निजाम याला ताब्यात घेतले. फॉरेन्सिक तज्ञ आणि डॉग स्क्वॉडलाही घटनास्थळी बोलावण्यात आले. वरिष्ठ अधिकाऱ्यांनीही जागेचे निरीक्षण केले. पोलिसांनी खुनाचा गुन्हा दाखल करून चौकशी सुरू केली आहे. या प्रकरणाची तपासणी पोलिस अधीक्षक आर्चित चांडक, अपर पोलिस अधीक्षक रेड्डी, शहर उपविभागीय पोलिस अधिकारी सुधर्शन पाटील यांच्या मार्गदर्शनाखाली पोलीस निरीक्षक शेख रहीम, उपनिरीक्षक जनार्दन खंडेराव, डीबी टीम आणि इतर कर्मचारी करत आहेत.
आकोला शहरात घडलेल्या या भयंकर हत्याकांडामुळे नागरिकांमध्ये भीतीचे आणि चिंतेचे वातावरण निर्माण झाले आहे.
