“ऑपरेशन उपलब्ध” अंतर्गत छत्रपती संभाजीनगर स्थानकावर तिकीट दलालीविरोधात रेल्वे सुरक्षा बल, नांदेड विभागाची कारवाई
अनधिकृत रेल्वे तिकीट विक्री व दलालीविरोधात सुरू असलेल्या कारवाईचा भाग म्हणून, दिनांक 08.09.2026 रोजी RPF/छत्रपती संभाजीनगर आणि केंद्रीय तपासणी शाखा (CIB)/RPF/नांदेड यांच्या संयुक्त पथकाने, RPF निरीक्षक/छत्रपती संभाजीनगर यांच्या देखरेखीखाली छत्रपती संभाजीनगर रेल्वे आरक्षण केंद्रावर गोपनीय पाळत ठेवून कारवाई केली.
या कारवाईदरम्यान तिकीट दलालीच्या संशयावरून जतीन जैस्वाल आणि कलमुद्दीन खान या दोन व्यक्तींना ताब्यात घेण्यात आले. पंचांच्या उपस्थितीत केलेल्या चौकशीत दोघांनीही प्रवाशांकडून कमिशन घेऊन त्यांच्या वतीने रेल्वे आरक्षणाची तिकिटे काढत असल्याची कबुली दिली. अशा प्रकारे ते अनधिकृत तिकीट बुकिंगसाठी प्रवाशांना सुविधा उपलब्ध करून देत होते.
पथकाने एकूण 12 प्रवाशांसाठीची दोन खुली 3AC आरक्षण तिकिटे, ज्यांची एकूण किंमत ₹24,090/- आहे, तसेच दोन कोरे आरक्षण मागणी अर्ज जप्त केले. जप्त केलेली तिकिटे व कागदपत्रे नियमानुसार जप्ती पंचनाम्याद्वारे ताब्यात घेण्यात आली.
दोन्ही आरोपींविरुद्ध RPF/छत्रपती संभाजीनगर गुन्हा क्र. 505/2026, रेल्वे अधिनियम, 1989 च्या कलम 143 अंतर्गत गुन्हा नोंदविण्यात आला आहे. BNSS-2023 मधील संबंधित तरतुदींनुसार दोघांना नोटीस देऊन सोडण्यात आले असून, माननीय न्यायालयाकडून समन्स प्राप्त झाल्यास त्यानुसार उपस्थित राहण्याचे निर्देश देण्यात आले आहेत.
या कारवाईतून रेल्वे आरक्षण व्यवस्थेचा गैरवापर रोखण्यासाठी, अनधिकृत तिकीट दलालीला आळा घालण्यासाठी तसेच सर्वसामान्य प्रामाणिक प्रवाशांचे हित व संरक्षण सुनिश्चित करण्यासाठी RPF आणि CIB कर्मचाऱ्यांनी दाखविलेली सतर्कता व समन्वय अधोरेखित होतो.
प्रवासी सुरक्षा अंतर्गत इतर महत्त्वपूर्ण उपक्रम:
“ऑपरेशन नन्हे फरिश्ते” अंतर्गत परभणी येथे RPF कर्मचाऱ्यांनी रेल्वे स्थानकाच्या फलाटावर एकट्याने फिरताना आढळलेल्या 13 वर्षीय अल्पवयीन मुलाची सुरक्षित सुटका केली. आवश्यक कायदेशीर प्रक्रिया पूर्ण करून त्याला बाल कल्याण समितीच्या स्वाधीन करण्यात आले.
“ऑपरेशन यात्री सुरक्षा” अंतर्गत CIB-D&I/नांदेड आणि शासकीय रेल्वे पोलीस (GRP)/नांदेड यांच्या संयुक्त पथकाने ट्रेन क्र. 11414 मधून प्रवास करणाऱ्या महिला प्रवाशाच्या सुमारे ₹2 लाख किमतीच्या सोन्याच्या मंगळसूत्राची चोरी/हिसकावून नेण्याच्या प्रकरणातील आरोपीस ताब्यात घेतले.
या सर्व कारवायांमधून RPF, CIB आणि GRP कर्मचाऱ्यांची सतर्कता, व्यावसायिकता आणि प्रवाशांच्या सुरक्षिततेप्रती असलेली बांधिलकी स्पष्टपणे दिसून येते.
