पदवीधर मतदारसंघाच्या निवडणुकीसाठी शिवसेना (उबाठा) पक्षाच्या प्रचाराला वेग

लोहा (चिंतामणी) : छत्रपती संभाजीनगर–मराठवाडा पदवीधर मतदारसंघाच्या निवडणूक २०२६ च्या पार्श्वभूमीवर शिवसेना (उद्धव बाळासाहेब ठाकरे) पक्षाच्या वतीने प्रचाराला वेग आला असून, पक्षाचे उमेदवार घुगे दिलीप हरिभाऊ यांच्या प्रचारार्थ लोहा येथे आयोजित कार्यक्रमाला शिवसैनिक, पदाधिकारी आणि पदवीधर मतदारांची मोठ्या संख्येने उपस्थिती लाभली. या कार्यक्रमात शिवसेनेचे नेते तथा माजी विरोधी पक्षनेते अंबादास दानवे यांनी उपस्थितांना संबोधित केले.

पदवीधर मतदारसंघाची निवडणूक लक्षात घेता उमेदवाराच्या प्रचारासाठी पक्षाच्या वतीने विविध स्तरांवर प्रयत्न केले जात आहेत. याच अनुषंगाने लोहा येथे आयोजित प्रचार कार्यक्रमात अंबादास दानवे यांच्या उपस्थितीमुळे शिवसेना पदाधिकारी व कार्यकर्त्यांमध्ये उत्साहाचे वातावरण पाहायला मिळाले. या कार्यक्रमाच्या माध्यमातून पदवीधर मतदारांशी संवाद साधण्यात आला.

यावेळी लोहा-कंधार विधानसभा परिसरातील शिवसेनेचे नेते डॉ. प्रा. पुरुषोत्तमभाऊ धोंडगे यांच्यासह शिवसेनेचे विविध पदाधिकारी, कार्यकर्ते आणि मोठ्या संख्येने पदवीधर मतदार उपस्थित होते. उपस्थितांनी प्रचार कार्यक्रमात सहभाग नोंदविला. आगामी पदवीधर मतदारसंघाच्या निवडणुकीच्या पार्श्वभूमीवर या कार्यक्रमाला राजकीयदृष्ट्या महत्त्व प्राप्त झाले आहे.

या कार्यक्रमाच्या निमित्ताने लोहा परिसरात पदवीधर मतदारसंघाच्या निवडणुकीची चर्चा रंगली असून, शिवसेना (उबाठा) पक्षाच्या उमेदवाराच्या प्रचारासाठी पक्षाचे नेते आणि पदाधिकारी सक्रिय झाल्याचे चित्र दिसून आले. छायाचित्र : विनोद महाबळे