नांदेड पासपोर्ट कार्यालयात अर्जदारांची होणारी गैरसोय; खासदार इम्रान प्रतापगढी यांच्याकडे प्रतिनिधित्व
नांदेड (प्रतिनिधी): नांदेड शहरातील हेड पोस्ट ऑफिसमध्ये सन २०१८ साली पासपोर्ट सुविधा केंद्र सुरू करण्यात आले होते. गेल्या सात वर्षांत ५० हजारांहून अधिक नागरिकांनी येथे आपले पासपोर्ट काढले आहेत. मात्र, अलीकडील काही दिवसांपासून नांदेड पासपोर्ट कार्यालयात अर्जदारांना त्रास दिला जात असल्याची तक्रार अनेकांनी केली आहे.
पासपोर्ट अधिनियमाप्रमाणे भारतीय नागरिकांना पासपोर्ट घेण्याचा अधिकार आहे. यासाठी जन्मतारखेचा एक पुरावा आणि राहण्याचा तसेच ओळखीचा एक पुरावा देणे बंधनकारक आहे. पूर्वी अनेक अर्जदारांनी आधारकार्ड व पॅनकार्ड दाखवून पासपोर्ट मिळवला होता. परंतु, सध्या नांदेड येथील पासपोर्ट कार्यालयात निवडणूक ओळखपत्र दाखविण्याची सक्ती केली जात होती, आणि आता सर्व अर्जदारांकडून जन्म प्रमाणपत्राची मागणी केली जात आहे.
विशेष म्हणजे अनेक वयोवृद्धांकडे जन्म प्रमाणपत्र नाही, तर काहींनी शाळेच्या सोडत प्रमाणपत्रावर (टीसी) आधारित अर्ज केले आहेत, परंतु तेही स्वीकारले जात नाही. यामुळे नांदेडमधील नागरिकांना मोठ्या प्रमाणात मनस्ताप सहन करावा लागत आहे. या संदर्भात अनेकांनी तक्रारी केल्या आहेत.
माजी नगरसेवक व काँग्रेसचे प्रवक्ते मुन्तजबुद्दीन यांनी नुकतेच दिल्ली येथे राज्यसभेचे खासदार इम्रान प्रतापगढी यांची भेट घेऊन या समस्येवर मेमोरँडम सादर केले. त्यांनी मागणी केली की, भारताचे परराष्ट्र मंत्री एस. जयशंकर यांच्याकडे तातडीने प्रतिनिधित्व करून नांदेड पासपोर्ट कार्यालयातील अर्जदारांच्या समस्या सोडवाव्यात.
खासदार इम्रान प्रतापगढी यांनी लवकरच परराष्ट्र मंत्र्यांकडे या प्रश्नावर प्रतिनिधित्व करण्याचे आश्वासन दिले. या प्रसंगी मुन्तजबुद्दीन यांच्यासोबत माजी उपमहापौर शमीम अब्दुल्ला देखील उपस्थित होते.
