नांदेड (प्रतिनिधी): गोदावरी नदीला आलेल्या प्रचंड पूरामुळे आणि शनिवारी सकाळी झालेल्या मुसळधार पावसामुळे नांदेड शहरात पूरसदृश्य परिस्थिती निर्माण झाली. अनेक निम्न भाग पाण्याखाली गेले. समेरा बाग परिसरातील शेकडो घरे पाण्यात बुडाल्याने नागरिकांमध्ये भीतीचे वातावरण निर्माण झाले. प्रशासनाला प्रत्येक ठिकाणी पोहोचण्यासाठी वेळ लागत होता.
अशा बिकट परिस्थितीत पोलिस शिपाई अकबर पठाण यांनी कोणत्याही सुरक्षात्मक साधनांशिवाय शौर्य दाखवले. आपल्या सहकाऱ्यांसह – वाल्गा टेलर यांचा मुलगा ताहिर उर्फ फहद खान आणि गोदावरी जीव रक्षक दलाचा सदस्य सय्यद अशफाक सय्यद नूर – यांच्या मदतीने त्यांनी गडद पाण्यात उडी घेतली आणि जवळपास २० नागरिकांचे प्राण वाचवले.
जीव धोक्यात घालून कर्तव्य बजावले
अकबर पठाण यांनी स्थानिक तरुणांना सोबत घेऊन जीव धोक्यात घालून केलेल्या या धाडसी कामगिरीमुळे मोठा अनर्थ टळला. त्यांचे हे कार्य पाहून नागरिकांनी त्यांना *“खरे हिरो”* म्हणून गौरविले आहे. “जेव्हा चारही बाजूला भीती, गोंधळ आणि निराशा होती, तेव्हा अकबर पठाण यांनी दाखवलेली धाडस, हिम्मत आणि मानवतेची भावना ही सर्वांसाठी आशेची किरण ठरली,” असे स्थानिकांचे म्हणणे आहे.
पुरस्काराची मागणी
अकबर पठाण यांच्या या उल्लेखनीय शौर्यामुळे प्रभावित होऊन स्थानिक नागरिकांनी सरकारकडे मागणी केली आहे की, त्यांच्या धाडसाची दखल घेऊन त्यांना *राष्ट्रपती पुरस्काराने* गौरविण्यात यावे.
