(प्रतिनिधी) : नांदेड शहरात सध्या फळांच्या दरात मोठी घट झाल्याचे चित्र दिसत आहे. गेल्या काही महिन्यांच्या तुलनेत या आठवड्यात फळांचे भाव कमी झाल्याने नागरिकांमध्ये आनंदाचे वातावरण आहे. बाजारपेठांमध्ये ग्राहकांची गर्दी वाढली असून लोक ताज्या फळांची खरेदी करण्यासाठी उत्साहाने पुढे येत आहेत.
बाजार समितीच्या माहितीनुसार, नांदेडमधील जुना मोंढा, शिवाजी नगर, वजिराबाद, श्री नगर, तरोडा नाका, आनंद नगर, मोठा बाजार आणि इतवारा, या भागातील फळ बाजारांमध्ये डिलिशन सफरचंद ७० रुपये किलो, केळी २० रुपये डझन, मोसंबी दीड किलो ५० रुपये, संत्री २ किलो ५० रुपये, चीकू ५० रुपये किलो, डाळिंब ६० रुपये किलो, पपई ३० रुपये किलो आणि जांभूळ ३० रुपये किलो दराने विक्री होत आहे.
फळ विक्रेत्यांच्या म्हणण्यानुसार, हवामान अनुकूल राहिल्याने आणि वाहतुकीत सुलभता आल्याने फळांचा पुरवठा मोठ्या प्रमाणावर वाढला आहे. महाराष्ट्रातील विविध जिल्ह्यांतून दररोज फळांचे ट्रक नांदेड बाजारात दाखल होत आहेत. त्यामुळे पुरवठा वाढल्याने दरात घसरण झाली आहे.
महागाईच्या काळात फळांचे दर कमी झाल्याने नागरिकांनी समाधान व्यक्त केले आहे. खरेदीसाठी आलेले एक नागरिक सलीम खान म्हणाले, “काही आठवड्यांपूर्वी सफरचंद १२० रुपये किलो होते, आता तेच ७० रुपयांना मिळत आहेत, हे सर्वसामान्यांसाठी मोठा दिलासा आहे.”
आरोग्यतज्ज्ञांच्या मते, हिवाळ्याच्या सुरुवातीस फळांचे सेवन शरीराला आवश्यक जीवनसत्त्वे आणि ऊर्जा पुरवते. डॉ. इरफान अहमद, आहारतज्ज्ञ, म्हणाले, “या हंगामात फळांचे सेवन रोगप्रतिकारक शक्ती वाढविण्यास मदत करते. लहान मुलांनी आणि ज्येष्ठ नागरिकांनी दररोज फळे खाल्ली पाहिजेत.”
बाजार समितीच्या स्रोतांच्या माहितीनुसार, सध्या फळांच्या दरातील ही घसरण पुढील काही आठवड्यांपर्यंत कायम राहण्याची शक्यता आहे.
नांदेडकरांसाठी ही एक उत्तम संधी आहे – ताज्या आणि स्वस्त फळांचा आस्वाद घ्या, शरीरात जीवनसत्त्वे वाढवा आणि निरोगी जीवनशैलीचा अंगीकार करा.
