नांदेडमध्ये भाजीपाल्याचे दर गगनाला भिडले – नागरिक हैराण, पावसामुळे निर्माण झाली तुटवडा परिस्थिती
प्रतिनिधी : नांदेड शहरात सध्या भाजीपाल्याचे दर प्रचंड वाढले आहेत. रोजच्या वापरातील भाज्या सर्वसामान्यांच्या आवाक्याबाहेर गेल्या आहेत. यंदा झालेल्या अतिवृष्टीमुळे शेतातील पिकांचे मोठे नुकसान झाले असून, बाजारपेठेत भाज्यांचा पुरवठा घटल्याने दरांनी अक्षरशः आकाश गाठले आहे.
शहरातील विविध बाजारपेठांमध्ये सध्या भाज्यांचे दर पुढीलप्रमाणे आहेत:
टोमॅटो ६० रुपये किलो, वांगी १२० रुपये किलो, फुलकोबी १४० रुपये किलो, तुरई १२० रुपये किलो, भेंडी ८० रुपये किलो, गवार फली १२० रुपये किलो, शेवगा फली १२० रुपये किलो, मोठा भोपळा प्रती नग ८० रुपये, लहान भोपळा प्रती नग ४० रुपये, मेथीची भाजी प्रती नग ५० रुपये, पालक १२० रुपये किलो, कारले १२० रुपये किलो, हिरवी मिरची ८० रुपये किलो, चवळीची शेंग १२० रुपये किलो, कोबी १०० रुपये किलो, काकडी आणि खीरा ८० रुपये किलो, सीमाची शेंग १०० रुपये किलो, तर शलजम १०० रुपये किलो विक्री होत आहे.
व्यापारी व शेतकऱ्यांच्या मते, या वर्षी झालेल्या अनियमित आणि अतिवृष्टीमुळे शेतांमध्ये उभ्या भाज्यांना मोठे नुकसान झाले आहे. अनेक भागांत पाणी साचल्याने पिके कुजून गेली किंवा वाहून गेली. त्यामुळे भाजीपाल्याचे उत्पादन मोठ्या प्रमाणावर घटले आहे आणि त्याचा थेट परिणाम दरवाढीवर झाला आहे.
स्थानिक व्यापारी मोहम्मद रियाज यांनी सांगितले की, “या वर्षी पावसाने भाजीपाल्याचे फार नुकसान केले आहे. आधी दररोज मोठ्या प्रमाणात भाज्या बाजारात येत होत्या, आता त्याच्या निम्म्याही प्रमाणात येत नाहीत.”
नागरिकांचे म्हणणे आहे की, भाजीपाल्याच्या या प्रचंड महागाईमुळे घरगुती बजेट कोलमडले आहे. गृहिणी सांगतात की, रोजच्या स्वयंपाकासाठी लागणाऱ्या भाज्या विकत घेणे आता कठीण झाले आहे.
बाजार समितीच्या सूत्रांनुसार, पुढील काही आठवड्यांत हवामान स्थिर राहिले तर दरात थोडीशी घट होण्याची शक्यता आहे. परंतु सध्यातरी किंमती स्थिर होण्याचे कोणतेही संकेत दिसत नाहीत.
नांदेडकर नागरिकांनी शासन आणि महापालिका प्रशासनाकडे मागणी केली आहे की, भाजीपाल्याचा पुरवठा सुरळीत ठेवण्यासाठी तातडीने उपाययोजना करण्यात याव्यात, जेणेकरून सर्वसामान्य जनतेला काहीसा दिलासा मिळेल.
