नांदेडमध्ये राष्ट्रवादी काँग्रेसकडून पाच नगराध्यक्षपदाच्या उमेदवारांची घोषणा; महायुतीत तणाव कायम

नांदेड, 14 नोव्हेंबर – नांदेड जिल्ह्यातील महायुतीची बैठक अद्याप न झालेल्या स्थितीत राष्ट्रवादी काँग्रेसने नगराध्यक्षपदासाठी पाच उमेदवारांची घोषणा करून राजकीय वातावरण तापवले आहे. पक्षाचे नेते आमदार प्रताप पाटील चिखलीकर यांनी पत्रकार परिषद घेत उमेदवारांची यादी जाहीर केली. यावेळी माजी खासदार भास्करराव खतगावकर उपस्थित होते.

घोषित उमेदवार
देगलूर: विजयमाला बालाजीराव टेकाळे
उमरी: शकुंतला भगवानराव मुदीराज
धर्माबाद: वैशालीताई विनायकराव कुलकर्णी
मुदखेड: गिरजाबाई माधवराव पचलिंगे
हिमायतनगर: महंमद जावेद अब्दुल गनी

जिल्ह्यातील 12 नगरपरिषदा आणि 1 नगरपंचायतीसाठी अर्ज प्रक्रिया सुरू असून 17 नोव्हेंबर ही अंतिम तारीख आहे. अशा स्थितीत राष्ट्रवादीने उमेदवारांची पहिली घोषणा करत आघाडी घेतली आहे.

महाल्युतीबाबत अनिश्चितता कायम
आ. चिखलीकरांनी स्पष्ट केले की भाजपाकडून कोणताही युतीचा प्रस्ताव आलेला नाही. प्रस्ताव आला तर “दोन पावले मागे घेऊनही चर्चा करण्याची तयारी आहे” असेही त्यांनी सांगितले. मात्र अद्याप कोणतीही ठोस हालचाल नसल्याचे त्यांनी नमूद केले.

राष्ट्रवादी आणि शिवसेना यांच्यात एक फेर चर्चा झाल्याची माहितीही चिखलीकरांनी दिली.

स्थानीक पातळीवर आरोप–प्रत्यारोप सुरू
शिवसेनेचे हेमंत पाटील यांनी भाजप नेते अशोक चव्हाण यांच्यावर टीका केली असताना, चिखलीकरांनीही चव्हाण यांना “नांदेडचा रावण” असे संबोधले. त्यामुळे महायुतीची चर्चा सुरू होण्यापूर्वीच तणाव वाढला आहे.

चर्चेसाठी समन्वय कोण करणार याबाबत विचारले असता चिखलीकर म्हणाले,
“आमच्याकडून माजी आमदार ओमप्रकाश पोकर्णा यांना पाठवू, पण अद्याप भाजपाकडून कोणताही प्रतिसाद नाही.”

राष्ट्रवादी काँग्रेसने स्पष्ट केले की महायुती न झाल्यास पक्ष सर्व नगरपालिका स्वबळावर लढवणार आहे.