श्रीक्षेत्र माळेगाव यात्रा – मिडिया सेंटर
मिलिंद व्यवहारे – ८६२६०२५८२५
क्षीक्षेत्र माळेगाव यात्रा, मीडिया सेंटर- दि. १९ डिसेंबर:-सुप्रसिद्ध श्रीक्षेत्र माळेगाव यात्रेला यंदा मोठ्या उत्साहात सुरुवात झाली आहे. या यात्रेच्या पार्श्वभूमीवर जिल्हा आरोग्य विभागाच्या वतीने आयोजित करण्यात आलेल्या भव्य आरोग्य प्रदर्शनीचे उद्घाटन कंधार-लोहा विधानसभा क्षेत्राचे आमदार प्रतापराव पाटील चिखलीकर यांच्या हस्ते करण्यात आले. ही आरोग्य प्रदर्शनी २५ डिसेंबर पर्यंत भाविकांसाठी खुली राहणार आहे.
शासकीय आरोग्य योजनांची माहिती व जनजागृती
या आरोग्य प्रदर्शनीमध्ये शासनाच्या विविध राष्ट्रीय आरोग्य कार्यक्रमांची माहिती देणारे आकर्षक स्टॉल्स, बॅनर्स व पोस्टर्स उभारण्यात आले आहेत. तळागाळातील नागरिकांपर्यंत आरोग्यविषयक माहिती पोहोचवणे व जनजागृती करणे हा या उपक्रमाचा मुख्य उद्देश आहे. आरोग्य कर्मचाऱ्यांमार्फत भाविकांना शासकीय योजनांचे लाभ, प्रतिबंधात्मक उपाय तसेच आरोग्य शिक्षणाबाबत सविस्तर मार्गदर्शन करण्यात येत आहे.
मोफत आरोग्य तपासणी व समुपदेशन
या प्रदर्शनीत माहितीबरोबरच मोफत आरोग्य तपासणी सुविधाही उपलब्ध करून देण्यात आल्या आहेत. यामध्येसिकलसेल तपासणी, सीवाय-टीबी तपासणी, एचआयव्ही तपासणी, विविध प्रकारच्या रक्त तपासण्या केल्या जात आहेत. यासोबतच फ्लिपचार्ट, घडीपत्रिका व माहितीपत्रकांच्या माध्यमातून नागरिकांचे आरोग्यविषयक समुपदेशन करण्यात येत आहे.
कलापथकाद्वारे प्रभावी जनजागृती
या आरोग्य प्रदर्शनीचे विशेष आकर्षण म्हणजे कलापथक. आरोग्य विषयांवर आधारित पथनाट्य व गीतांच्या माध्यमातून हजारो भाविकांमध्ये मनोरंजनातून प्रबोधन करण्यात येत असून, या उपक्रमाला भाविकांचा उत्स्फूर्त प्रतिसाद मिळत आहे.
प्रशासकीय नियोजन व मान्यवरांची उपस्थिती
या उपक्रमाचे नियोजन जिल्हा आरोग्य अधिकारी डॉ. संगीता देशमुख यांनी केले असून त्यांच्या मार्गदर्शनाखाली आरोग्य विभागाची टीम प्रभावीपणे कार्यरत आहे. जिल्हाधिकारी राहुल कर्डिले व मुख्य कार्यकारी अधिकारी मेघना कावली यांच्या विशेष मार्गदर्शनाखाली ही आरोग्य प्रदर्शनी राबविण्यात येत आहे. माळेगाव यात्रेत येणाऱ्या लाखो भाविकांनी या आरोग्य प्रदर्शनीचा लाभ घ्यावा व आपल्या आरोग्याबाबत जागरूक राहावे,असे आवाहन जिल्हा आरोग्य अधिकारी डॉ. संगीता देशमुख यांनी केले आहे.
