श्रीक्षेत्र माळेगाव, मीडिया सेंटर, दिनांक 22 डिसेंबर- माळेगाव यात्रेनिमित्त सोमवारी पार पडलेल्या लावणी महोत्सवात एकापेक्षा एक दिलकश, बहारदार आणि ठसकेबाज लावण्यांचे सादरीकरण करण्यात आले. नटले तुमच्यासाठी दिलबरा राजसा विडा रंगला ओठी…, सांगा ना कशी दिसते मी या नऊवारीत…, अशा सदाबहार लावण्यांनी रसिकांची मने जिंकली.
या लावणी महोत्सवात रूपा परभणीकर, अंबिका-अनुराधा लखनगावकर, स्नेहा-शामल लखनगावकर, मंगल-माया खामगावकर, आशा-वैशाली नगरकर, पूनम कुडाळकर प्रस्तुत तुमच्यासाठी काय पण, अमर पुणेकर निर्मित नटखट सुंदरा तसेच शाहीर मस्के व अनुराधा नांदेडकर अशा आठ नामवंत संचांनी आपली कला सादर केली.
डोईवर पाटी… मी आले तुम्हासाठी…, अहो यांना, आहो घ्या ना… आंबा कोल्हापुरी…, औंदा लगीन करायचं मी ठरवलं आहे बाई…, मला कोल्हापूर एक पैलवान पाहिजे…, रूप देखणं, रेखीव बांधा, कुंकू लावलं कपाळी…, राया थेंबानं केलंय मला गार… अशा बहारदार लावण्यांना रसिकांनी प्रचंड दाद दिली. संपूर्ण कार्यक्रमात रसिकांनी ताल धरत उत्स्फूर्त प्रतिसाद दिला. कार्यक्रमाच्या शेवटी उपस्थित सर्व कलावंतांचा जिल्हा परिषदेच्या वतीने स्मृतिचिन्ह व प्रमाणपत्र देऊन सत्कार करण्यात आला.
रसिकांच्या प्रेमामुळेच पारंपरिक लावणी आजही टिकून आहे, असे मत लावणी महोत्सवात सहभागी झालेल्या कलावंतांनी यावेळी व्यक्त केले.
