UFBU कडून देशव्यापी आंदोलन नांदेडमध्ये SBI शिवाजी नगर मुख्य शाखेसमोर जोरदार निदर्शने
नांदेड | ३० डिसेंबर २०२५ युनायटेड फोरम ऑफ बँक युनियन्स (UFBU) च्या वतीने आज ३० डिसेंबर २०२५ रोजी देशभरात एकाचवेळी आंदोलन करण्यात आले. त्याच अनुषंगाने नांदेड शहरातील SBI बँक, शिवाजी नगर मुख्य शाखेसमोर UFBU च्या पदाधिकारी व बँक कर्मचाऱ्यांनी जोरदार निदर्शने केली.
बँक कर्मचाऱ्यांसाठी आठवड्याला ५ दिवस बँकिंग प्रणाली तातडीने लागू करावी या प्रमुख आणि दीर्घकाळ प्रलंबित मागणीसाठी हे आंदोलन करण्यात आले. आंदोलनादरम्यान कर्मचाऱ्यांनी घोषणाबाजी करत सरकार व बँक व्यवस्थापनाच्या धोरणांचा निषेध केला.
या आंदोलनात AIBEA, AIBOC, NCBE, AIBOA, BEFI, INBEF, INBOC, NOBW आणि NOBO या सर्व प्रमुख बँक कर्मचारी संघटनांचे पदाधिकारी व कार्यकर्ते सहभागी झाले होते. बँक कर्मचाऱ्यांवर वाढत चाललेला कामाचा ताण, दीर्घ कामाचे तास, सतत बदलणारी धोरणे आणि त्यामुळे बिघडत चाललेला काम–जीवन समतोल यामुळे ५ दिवसांचा आठवडा अत्यावश्यक असल्याचे UFBU कडून यावेळी स्पष्ट करण्यात आले.
UFBU च्या नेत्यांनी सांगितले की, इतर शासकीय व निमशासकीय विभागांप्रमाणे बँक कर्मचाऱ्यांनाही आठवड्याला ५ दिवस कामकाजाची सुविधा देण्यात यावी. अनेक देशांमध्ये ही प्रणाली यशस्वीपणे राबवली जात असून भारतातही ती तातडीने लागू करणे गरजेचे आहे.
दरम्यान, सरकार व बँक व्यवस्थापनाने मागण्यांकडे दुर्लक्ष केल्यास आगामी काळात आंदोलन आणखी तीव्र करण्याचा इशारा UFBU कडून देण्यात आला आहे. या आंदोलनामुळे देशभरातील बँकिंग व्यवहार, चेक क्लिअरन्स, कर्ज प्रक्रिया व ग्राहक सेवांवर परिणाम होण्याची शक्यता वर्तवण्यात येत आहे.
