‘ऑपरेशन यात्री सुरक्षा’ आणि ‘ऑपरेशन अमानत’ अंतर्गत आरपीएफ नांदेडची उल्लेखनीय कामगिरी

प्रवाशांच्या सुरक्षिततेसाठी आणि त्यांच्या मालमत्तेच्या संरक्षणासाठी रेल्वे सुरक्षा बल (RPF) नांदेड विभाग सतत सतर्कपणे कार्य करत आहे. त्याचाच एक भाग म्हणून ‘ऑपरेशन यात्री सुरक्षा’ आणि ‘ऑपरेशन अमानत’ अंतर्गत आरपीएफने चोरीचा प्रयत्न करणाऱ्या संशयिताला पकडले तसेच प्रवाशाची हरवलेली बॅग सुरक्षितपणे परत केली.

ऑपरेशन यात्री सुरक्षा अंतर्गत दिनांक 11 मार्च 2026 रोजी सायंकाळी सुमारे 20:00 वाजता नांदेड रेल्वे स्थानकाच्या प्लॅटफॉर्म क्र. 1 वर फूट ओव्हर ब्रिज जवळ CIB-D&I/NED व GRP/NED चे कर्मचारी चोरी करणाऱ्या संशयितांवर लक्ष ठेवून गस्त घालत होते. यावेळी श्री के. बालाजी (HC-259), श्री एम. जी. चौहान (HC-646) आणि श्री अजीत सिंह (CT-2166) यांनी सोनू (वय 25 वर्षे), रा. नांदेड याला प्रवाशांचे सामान चोरी करण्याचा प्रयत्न करत असताना पकडले.

यानंतर त्याला पुढील कायदेशीर कारवाईसाठी GRP नांदेड यांच्या ताब्यात देण्यात आले असून महाराष्ट्र पोलीस कायद्याच्या कलम 110 व 117 अंतर्गत गुन्हा क्र. 19/2026 दिनांक 11.03.2026 नोंद करण्यात आला आहे.
तसेच ऑपरेशन अमानत अंतर्गत Train No. 12787 Express मध्ये राहिलेल्या बॅगेबाबत DSCR नांदेड येथे तक्रार प्राप्त झाली. तक्रार मिळताच आरपीएफ नागरसोल येथील कॉन्स्टेबल श्री प्रविण कुमार (Con/2121) यांनी ट्रेन नागरसोल स्थानकावर आल्यानंतर S-7 कोचमध्ये शोध घेतला आणि एक तपकिरी रंगाची मिनी हँडबॅग हस्तगत केली.

सदर बॅग सुरक्षितपणे आरपीएफ पोस्ट नागरसोल येथे ठेवण्यात आली. नंतर ही बॅग विजयवाडा येथील श्री मोहम्मद जिलानी यांची असल्याचे निष्पन्न झाले. त्यांनी भीमावरम टाउन ते चेरलपल्ली प्रवास करताना चुकून ती बॅग ट्रेनमध्येच राहिली होती.
सदर बॅगमध्ये रु. 3,600 रोख रक्कम, अंदाजे रु. 15,000 किमतीचा विवो मोबाईल फोन, दोन चष्मे, एटीएम कार्ड, ओळखपत्रे व इतर वैयक्तिक कागदपत्रे असे मिळून सुमारे रु. 21,000 किमतीचा माल होता.

प्रवाशाची ओळख आधार कार्डद्वारे पडताळून सदर बॅग त्यांना सुरक्षितपणे परत करण्यात आली. प्रवाशाने आरपीएफच्या तत्परतेबद्दल आणि प्रामाणिक सेवेसाठी मनापासून आभार व्यक्त केले.
या कारवायांमुळे आरपीएफ नांदेड विभागाची प्रवाशांच्या सुरक्षिततेबाबतची दक्षता आणि बांधिलकी पुन्हा एकदा अधोरेखित झाली आहे.