नांदेड जिल्ह्यात अवैध व्यवसायांविरुद्ध पोलिसांची ‘मास रेड’ मोहीम; ४७ गुन्हे दाखल, ६७ आरोपींवर कारवाई
नांदेड (जिल्हा प्रतिनिधी) : नांदेड जिल्ह्यातील अवैध व्यवसायांचे समूळ उच्चाटन करण्याच्या उद्देशाने पोलीस अधीक्षक डॉ. नीलाभ रोहन यांच्या आदेशानुसार १८ सप्टेंबर २०२६ रोजी जिल्हाभरात विशेष ‘मास रेड’ मोहीम राबविण्यात आली. या मोहिमेत जिल्ह्यातील सर्व पोलीस ठाण्यांनी समन्वयाने शहरी तसेच ग्रामीण भागातील संशयित ठिकाणी धाडसत्र राबवून दारूबंदी, मटका-जुगार, अवैध रेती वाहतूक तसेच इतर बेकायदेशीर व्यवसायांविरोधात कारवाई केली.
या विशेष मोहिमेत एकूण ४७ गुन्हे दाखल करण्यात आले असून ६७ आरोपींवर कायदेशीर कारवाई करण्यात आली. पोलिसांनी विविध कारवायांमध्ये एकूण ५ लाख ६१ हजार ३४५ रुपयांचा मुद्देमाल जप्त केला आहे.
मोहिमेअंतर्गत मटका-जुगाराच्या ४ प्रकरणांत १९ आरोपींवर कारवाई करून ६६ हजार ८८० रुपयांचा मुद्देमाल जप्त करण्यात आला. दारूबंदीच्या एका प्रकरणात एका आरोपीवर कारवाई करून ८९ हजार ४६५ रुपयांचा मुद्देमाल जप्त करण्यात आला. तर अवैध रेतीसंदर्भात ४२ गुन्हे दाखल करून ४७ आरोपींवर कारवाई करण्यात आली असून ४ लाख ५ हजार रुपयांचा मुद्देमाल जप्त करण्यात आला.
ही कारवाई दुय्यम अधिकारी व पोलीस अंमलदारांनी संयुक्तपणे केली.
जिल्ह्यातील कायदा व सुव्यवस्था अबाधित ठेवण्यासाठी अशा विशेष मोहिमा यापुढेही सातत्याने राबविण्यात येणार असल्याचे पोलिसांनी सांगितले. तसेच अवैध व्यवसायांबाबतची माहिती नागरिकांनी निर्भयपणे स्थानिक पोलीस ठाणे किंवा डायल ११२ वर देऊन पोलिसांना सहकार्य करावे, असे आवाहन करण्यात आले आहे.
