मुदखेड (ता. १० मे २०२५): तालुक्यातील मुगट येथील प्राथमिक आरोग्य केंद्राच्या आवारातील बागेत आज दुपारी सुमारे १.३० वाजता अचानक आग लागली. ही आग वैद्यकीय अधिकारी यांच्या निवासस्थान परिसरातील बागेत लागली असून, विविध प्रकारच्या आयुर्वेदिक व औषधी झाडांचे मोठे नुकसान झाले आहे.
सदरील बागेत आरोग्य केंद्राच्या वतीने आयुर्वेदिक झाडे लावण्यात आली होती. अचानक लागलेल्या या आगीमुळे झाडे जळून खाक झाली. आग लागल्याचे लक्षात येताच वैद्यकीय अधिकारी डॉ. झिकरे मॅडम, सुपरवायझर प्रदीप राठोड, आरोग्य सेविका हिंगोले ताई, आरोग्य कर्मचारी शिवाजी शिंदे, केसरबाई, तोडे सिस्टर व परिचर राठोड ताई यांनी तत्काळ पाण्याच्या मदतीने आग विझवण्यासाठी शर्थीचे प्रयत्न केले.
त्यांच्या वेळीच हस्तक्षेपामुळे आग मोठ्या प्रमाणात पसरली नाही आणि इतर इमारतींना धोका टळला. मात्र या आगीत अनेक औषधी व दुर्मिळ वनस्पतीचे नुकसान झाले आहे.
आग लागण्याचे नेमके कारण अद्याप समजू शकले नसले, तरी सूर्यप्रकाशामुळे कोरड्या गवताला लागलेली ठिणगी ही शक्यता व्यक्त केली जात आहे. घटनेची माहिती स्थानिक प्रशासन व वनविभागाला देण्यात आली असून, अधिक तपास सुरू आहे.
स्थानिक ग्रामस्थांनी आणि आरोग्य कर्मचाऱ्यांनी वेळीच हस्तक्षेप करून संभाव्य मोठा अनर्थ टळवला, याचे सर्वत्र कौतुक होत आहे.
