तीन विधीसंघर्षित बालकांकडून मोटारसायकल चोरीचे तीन गुन्हे उघडकीस — एक लाख रुपयांचा मुद्देमाल जप्त

नांदेड (दि. ८ जून): स्थानीय गुन्हे शाखेच्या पथकाने तात्काळ आणि परिणामकारक कारवाई करत तीन विधीसंघर्षित बालकांकडून चोरीच्या तीन मोटारसायकली हस्तगत केल्या असून, एकूण ₹1,00,000/- किमतीचा मुद्देमाल जप्त करण्यात आला आहे.

ही कामगिरी पोलीस अधीक्षक मा. श्री. अविनाश कुमार, अपर पोलीस अधीक्षक भोकर श्री. खंडेराव धरणे, व अपर पोलीस अधीक्षक नांदेड श्री. सुरज गुरव यांच्या मार्गदर्शनाखाली पार पडली.
कारवाईचे नेतृत्व स्थानीय गुन्हे शाखेचे पोलीस निरीक्षक श्री. उदय खंडेराय, पो.उ.नि. श्री. नागनाथ तुकडे व श्री. साईनाथ पुयड यांनी केले. त्यांना सहाय्यक म्हणून पोलीस अंमलदार शंकर मैसनवाड, सखाराम नवघरे, राजू डोंगरे, संजय राठोड, चालक सिद्धार्थ सोनसळे तसेच सायबर सेलचे महेश बडगु सहभागी होते.

पोलीस अधीक्षकांनी दिलेल्या निर्देशांनुसार, नांदेड जिल्ह्यातील प्रलंबित मालमत्तेसंबंधी गुन्ह्यांचा तपास सुरू होता. दि. ८ जून २०२५ रोजी स्था.गु.शा.च्या पथकाला गोपनीय माहिती मिळाली की, तीन विधीसंघर्षित बालकांनी विविध ठिकाणांहून मोटारसायकली चोरून त्या बाभुळगाव (ता. नांदेड) येथील एका आखाड्यात लपवून ठेवल्या आहेत.

त्यानुसार पथकाने तत्काळ छापा टाकून तीन मोटारसायकली जप्त केल्या. घटनास्थळी उपस्थित दोन बालकांकडे चौकशी केली असता त्यांनी चोरीची कबुली दिली. त्यांनी नायगांव (ता. नायगांव), नांदेड शहर व अर्धापूर (ता. अर्धापूर) येथून मोटारसायकली चोरल्याचे सांगितले.

तपासादरम्यान उघडकीस आले की, सदर चोरीप्रकरणी खालील पोलीस ठाण्यांमध्ये गुन्ह्यांची नोंद आहे: पोलीस स्टेशन विमानतळ, नांदेड, पोलीस स्टेशन कुंटूर, पोलीस स्टेशन अर्धापूर

बालकांच्या पालकांच्या ताब्यातून सर्व तीन मोटारसायकली जप्त करण्यात आल्या. एकूण ₹1,00,000/- किमतीचा मुद्देमाल तपासासाठी विमानतळ पोलीस ठाण्याकडे वर्ग करण्यात आला आहे.या यशस्वी कारवाईबद्दल मा. पोलीस अधीक्षक श्री. अविनाश कुमार यांनी गुन्हे उघडकीस आणणाऱ्या पथकाचे विशेष कौतुक करत, त्यांच्या दक्षतेचे आणि तत्परतेचे अभिनंदन केले आहे.