नांदेड अग्निशमन दलाच्या निवासस्थानाच्या रिक्त इमारतीत चोरी, गैरवापर व असामाजिक कृतींचा वाढता विळखा
नांदेड, 18 जुन 2025: लेबर कॉलनी परिसरात २०१९-२०२० मध्ये बांधण्यात आलेले अग्निशमन दलाचे अधिकाऱ्यांचे व कर्मचाऱ्यांचे निवासस्थान अजूनही वापरात न आल्यामुळे, आता तेथे चोरी, मद्यपान, जुगार व असामाजिक वर्तनाचे अड्डे तयार झाले आहेत, असा गंभीर आरोप स्थानिक नागरिकांनी एका लेखी निवेदनातून नांदेड महानगरपालिका आयुक्तांकडे केला आहे.
निवेदनात नमूद केल्याप्रमाणे, रिक्त निवासस्थानातून दारे, खिडक्या आणि अन्य साखळदारे वस्तू चोरीला जात आहेत. याचबरोबर, मद्यधुंद व्यक्ती या ठिकाणी लघवी, संडास व भांडणं करत असून, त्यामुळे लेबर कॉलनीतील स्थानिक नागरिक हैराण झाले आहेत.
स्थानिक नागरिकांच्या म्हणण्यानुसार, याबाबत वेळोवेळी अग्निशमन विभागाकडे तोंडी व लेखी स्वरूपात तक्रारी केल्या असूनही, कोणतीही ठोस कार्यवाही करण्यात आलेली नाही. त्यांनी स्पष्टपणे चेतावणी दिली आहे की, त्वरित पावले उचलली नाहीत तर तीव्र आंदोलन छेडले जाईल.
निवेदनाच्या प्रती मा. जिल्हाधिकारी, नांदेड यांना कार्यवाहीसाठी पाठवण्यात आल्या आहेत.
नागरिकांची मागणी: रिक्त निवासस्थानात कर्मचाऱ्यांना तातडीने रहिवासासाठी स्थलांतरित करणे.
परिसरात सुरक्षा वाढवणे. असामाजिक कृत्यांवर पोलिसांच्या मदतीने बंदोबस्त ठेवणे.
निवेदनकर्ते: सदर अर्जात सईद मुनिरुद्दीन, नजीर कुरेशी, मोहम्मद इक्बाल, मिन्हाज, गजानन, सलीम, नदीम आदी स्थानिकांनी स्वाक्षरी करून स्थानिक जनतेच्या त्रासाला वाचा फोडली आहे.
