हैदराबादच्या बेगमपेट विमानतळाला बॉम्बने उडवण्याची धमकी; संपूर्ण परिसरात हाय अलर्ट जारी
हैदराबाद / प्रतिनिधी: १८ जुने २०२५ / हैदराबादमधील बेगमपेट विमानतळावर बुधवारी सकाळी बॉम्बने उडवण्याची धमकी मिळाल्याने एकच खळबळ उडाली. सुरक्षा यंत्रणा आणि पोलिसांनी तत्काळ हाय अलर्ट जाहीर करून संपूर्ण विमानतळावर तपासणी मोहीम सुरू केली.
सकाळी धमकी मिळताच बॉम्ब शोध पथक आणि श्वानपथक तैनात करण्यात आले. सर्व टर्मिनल्स, पार्कींग परिसर, प्रवासी कक्ष तसेच इतर संवेदनशील भागांची तपासणी करण्यात येत आहे.
धमकीबाबत तपशील
पोलिसांनी दिलेल्या प्राथमिक माहितीनुसार, धमकीचे स्वरूप गंभीर होते आणि ती फोन किंवा ईमेलद्वारे मिळाल्याची शक्यता वर्तवली जात आहे. संबंधित यंत्रणांनी धमकी गंभीर मानत ऑपरेशन सुरू केले असून, एनएसजीच्या पथकांनाही सतर्क राहण्यास सांगण्यात आले आहे.
दुसरी घटना: इंडिगो विमानाला नागपुरात आपत्कालीन लँडिंग
या घटनेच्या काही तासांपूर्वीच मंगळवारी कोचीहून दिल्लीला जाणाऱ्या इंडिगो विमानाला बॉम्बच्या धमकीनंतर नागपूरमध्ये आपत्कालीन लँडिंग करावे लागले होते. हे विमान मस्कतहून कोची विमानतळावर आले होते आणि तेथून सकाळी ९.३१ वाजता दिल्लीसाठी रवाना झाले होते.
ईमेलद्वारे मिळाली धमकी
कोची आंतरराष्ट्रीय विमानतळाच्या अधिकृत ईमेल आयडीवर बॉम्बची धमकी मिळाली होती. या ईमेलमधील माहिती विशिष्ट असल्याचे सांगत, ती तात्काळ पोलिस नियंत्रण कक्ष आणि सुरक्षा अधिकाऱ्यांना कळवण्यात आली. त्यानंतर नागपूर विमानतळावर आपत्कालीन परिस्थितीत सुरक्षित उतरणे सुनिश्चित करण्यात आले.
सुरक्षा यंत्रणांचा सतर्कपणा
या दोन घटनांमुळे राष्ट्रीय पातळीवर विमानतळ सुरक्षेचा मुद्दा पुन्हा ऐरणीवर आला आहे. सीआयएसएफ, स्थानिक पोलीस, बॉम्ब शोध पथक आणि केंद्रीय गुप्तचर यंत्रणा सर्वांनी बेगमपेट विमानतळ तसेच देशातील अन्य प्रमुख विमानतळांवर सुरक्षा वाढवली आहे.
सध्या कोणताही बॉम्ब सापडलेला नाही, मात्र शोध मोहीम सुरू आहे. पोलिसांनी सांगितले की, ही धमकी गंभीर स्वरूपाची असून तिचा सखोल तपास सुरू आहे.
या घटनेमुळे प्रवाशांमध्ये चिंता पसरली असून, फ्लाइट वेळापत्रकातही विलंब होण्याची शक्यता आहे. प्रशासनाने प्रवाशांना घाबरून न जाता अधिकृत सूचनांचे पालन करण्याचे आवाहन केले आहे.
