नांदेड (ता. ३१ ऑगस्ट) : प्रतिनिधी शेख रियाज / नांदेड वाघाळा महानगरपालिकेने शहरातील घनकचरा व्यवस्थापनासाठी निविदा दिलेल्या गुत्तेदाराविरोधात गंभीर अनियमिततेची तक्रार नोंदविण्यात आली आहे. ही तक्रार गौरव रामकिशन कोटगिरे, सामाजिक कार्यकर्ते व शिवसेना (उबाठा) चे माजी शहरप्रमुख यांनी नांदेड ग्रामीण पोलिस ठाण्यात सादर केली आहे.
तक्रारीनुसार, सदर कंपनीने शहरातील कचरा उचलण्याऐवजी गाड्यांमध्ये दगड, माती, प्लायवूड, विटा, फरशीचे तुकडे, नालीतील चिखल, मिलमधील वेस्टेज सोयाबीन भुसा, भिजलेले गाद्या तसेच बायोमेडिकल कचरा** यांचा समावेश करून वजन वाढविल्याचे निदर्शनास आले आहे. इतकेच नव्हे तर झाडांच्या फांद्या देखील या गाड्यांमध्ये टाकण्यात आल्याचे पुरावे (व्हिडीओ) अर्जदारांनी पोलिसांना उपलब्ध करून दिले आहेत.
कोटगिरे यांनी आरोप केला आहे की, हलक्या वजनाचा खरा कचरा जागेवरच सडत राहतो आणि जड वस्तू गाड्यांमध्ये टाकून बिल वाढविण्याचे काम गुत्तेदाराकडून केले जाते. त्यामुळे नांदेडकरांच्या पैशांचा अपव्यय होत असून शासनाची फसवणूक होत आहे.
तक्रारीत पुढे म्हटले आहे की, स्वच्छता सहाय्यक आयुक्त गुलाम सादिक यांच्याकडे फोनवरून याची माहिती देण्यात आली होती. मात्र, संबंधित विभागाने चौकशीसाठी अधिकारी पाठवूनही कारवाई करण्यास टाळाटाळ केली. त्यामुळे या प्रकरणात गुत्तेदारासोबत महानगरपालिकेतील अधिकाऱ्यांचे संगनमत असल्याचा संशय व्यक्त करण्यात आला आहे.
अर्जदारांनी पोलिस निरीक्षकांना सखोल चौकशी करून संबंधित गुत्तेदार व अधिकाऱ्यांवर कठोर कारवाई करण्याची मागणी केली आहे.
यावरून स्पष्ट होते की नांदेड महानगरपालिकेच्या घनकचरा व्यवस्थापनात गंभीर अनियमितता असून या प्रकरणी प्रशासनाने तातडीने कारवाई करण्याची गरज आहे.
