मिरचीपुड डोळ्यात फेकून जबरी चोरी करणारा आरोपी सहा तासांत अटकेत – नांदेड ग्रामीण पोलिसांची धडक कामगिरी, 1,22,850 मुद्देमाल जप्त
नांदेड (प्रतिनिधी): नांदेड ग्रामीण पोलिसांनी अवघ्या सहा तासांच्या आत मिरचीपुड डोळ्यात फेकून जबरी चोरी करणाऱ्या आरोपीला अटक करत 1,22,850 रुपयांचा मुद्देमाल हस्तगत करण्यात यश मिळवले आहे. या प्रकरणातील आरोपीचे नाव शेख सलमान शेख अन्वर (वय 28 वर्षे, व्यवसाय ऑटोचालक, रा. खुदबेनगर चौक, हिंदुस्तान मेडिकल जवळ, नांदेड) असे आहे.
जप्त मुद्देमाल: नगदी रक्कम 95,850/-, सॅमसंग कंपनीचा टॅब (किंमत 22,000/-)
बायोमेट्रिक मशीन (किंमत 5,000/-), एकूण मुद्देमाल 1,22,850/-
फिर्यादी भारत फायनान्स इन्क्लुजन लिमिटेडचे संघ व्यवस्थापक हे बचत गटाची वसुली करत असताना त्यांच्या जवळ वरील रक्कम व साहित्य होते. यावेळी जवाद कॉलनी येथील ईदगाह मैदानाच्या बाजूस एका अज्ञात इसमाने त्यांच्या डोळ्यात मिरचीपुड फेकून पैशाची बॅग व इतर साहित्य जबरीने हिसकावून पळ काढला.
या घटनेवरून नांदेड ग्रामीण पोलीस ठाण्यात गुन्हा दाखल करण्यात आला. पोलिस अधीक्षक मा. श्री. अविनाश कुमार यांनी मालमत्तेविरुद्धचे गुन्हे उघडकीस आणण्याचे आदेश सर्व पोलिस ठाण्यांना दिले होते. त्यानुसार पोलिस निरीक्षक ओमकांत चिंचोलकर यांच्या मार्गदर्शनाखाली गुन्हे शोध पथकाने तपासाची चक्रे फिरवली.
गोपनीय माहितीच्या आधारे पोलिसांनी केवळ सहा तासांत आरोपीचा शोध लावून त्याला ताब्यात घेतले. आरोपीकडून चोरी केलेला मुद्देमाल — रोख रक्कम 95,850, सॅमसंग टॅब 22,000 आणि बायोमेट्रिक मशीन 5,000 असा एकूण 1,22,850 — हस्तगत करण्यात आला आहे. आरोपीवर अटकेची कारवाई करण्यात आली असून, पुढील तपास सुरू आहे.
