महामंडळ आणि खाजगी बसचा भीषण अपघात 27 प्रवासी जखमी, 8 गंभीर

देगलूर (प्रतिनिधी) : देगलूर तालुक्यातील बागण टाकळी गावाजवळ सोमवारी (दि. 20 ऑक्टोबर) सायंकाळी साडेपाचच्या सुमारास राज्य परिवहन महामंडळाची बस आणि खाजगी बस यांचा समोरासमोर भीषण अपघात झाला. या अपघातात 27 प्रवासी जखमी झाले, त्यापैकी आठ जण गंभीर असून त्यांना पुढील उपचारासाठी नांदेड शासकीय रुग्णालयात हलविण्यात आले आहे.

अपघाताच्या वेळी परिसरात जोरदार पावसाला सुरुवात झाली होती. हवामान खात्याने पावसाचा इशारा दिला होता, आणि त्यानुसार पावसामुळे रस्ता घसरट झाल्याने बसचा ताबा सुटून समोरून येणाऱ्या दुसऱ्या बसला धडक दिल्याची शक्यता व्यक्त केली जात आहे.

अपघातात महामंडळाची MH-14 BT-1427 ही बस आणि खाजगी प्रवासी बस MH-14 BA-9350 या दोन गाड्यांचा समावेश आहे. दोन्ही बसमध्ये शेकडो प्रवासी होते. अपघातानंतर बसच्या पुढील भागाचा चक्काचूर झाला. स्थानिक नागरिकांनी तातडीने धाव घेत जखमींना बसमधून बाहेर काढले आणि देगलूर ग्रामीण रुग्णालयात दाखल केले.

प्राथमिक उपचारानंतर गंभीर जखमींना नांदेड जिल्हा रुग्णालयात हलविण्यात आले आहे. जखमींमध्ये काही महिला आणि लहान मुलांचाही समावेश असल्याची माहिती स्थानिक सूत्रांनी दिली.

पोलिस यंत्रणा उशिरा घटनास्थळी
अपघातानंतर जवळपास अर्धा तास पोलिस यंत्रणा घटनास्थळी पोहोचली नाही, त्यामुळे दोन्ही बाजूंनी वाहनांच्या मोठ्या रांगा लागल्या आणि वाहतूक कोंडी निर्माण झाली. पावसामुळे आधीच प्रवास अडथळ्याचा झाला होता, त्यात अपघातामुळे परिस्थिती अधिक बिकट बनली.

वाहतूक कोंडीतून मार्ग काढण्यासाठी नागरिकांनी स्वयंस्फूर्तीने प्रयत्न केले. मात्र पोलिसांचा उशीर पाहून वाहनचालक व प्रवासी वर्गात संतापाची लाट पसरली. अनेकांनी प्रशासनाच्या दिरंगाईवर नाराजी व्यक्त केली.

स्थानिक नागरिकांचा संताप
स्थानिक नागरिकांनी सांगितले, “अपघातानंतर अर्धा तास कोणीही पोलिस आला नाही. आम्हीच प्रवाशांना मदत केली. पावसात आणि अंधारात परिस्थिती भीषण झाली होती.”

उपचार सुरू
अपघातात जखमी झालेल्या प्रवाशांपैकी बहुतेकांना किरकोळ जखमा असून सर्वांचा उपचार देगलूर ग्रामीण रुग्णालयात सुरू आहे. डॉक्टरांनी सांगितले की, गंभीर जखमींना तातडीने नांदेडला हलविण्यात आले असून त्यांच्यावर आवश्यक उपचार सुरू आहेत.