नांदेड नांदेड लोकसभेचे खासदार मा. रवींद्र वसंतराव पाटील चव्हाण यांच्या आदेशानुसार आणि माजी महापौर तथा शहर काँग्रेस कमिटीचे महानगराध्यक्ष अब्दुल सत्तार यांच्या सुचनेनुसार, शहरातील पूरग्रस्त नागरिकांच्या तातडीच्या प्रश्नांवर शहर काँग्रेस कमिटीने जिल्हाधिकाऱ्यांना निवेदन दिले.
मागील महिन्यात झालेल्या अतिवृष्टी आणि त्यानंतर आलेल्या महापुरामुळे शहरातील अनेक भागातील गोरगरीब जनता बाधित झाली आहे. मात्र, या भागातील अनेक नागरिकांच्या घरांचे अद्याप सर्वेक्षण झालेले नाही. त्यामुळे त्यांची नावे शासनाच्या पूरग्रस्त यादीत समाविष्ट करण्यात आलेली नाहीत.
या नागरिकांना घरे सोडून इतर ठिकाणी राहावे लागत आहे. त्यामुळे काँग्रेस कमिटीने प्रशासनाला तातडीने सर्वेक्षण करून पूरग्रस्तांना शासनाकडून आर्थिक अनुदान मंजूर करण्याची मागणी केली आहे. अन्यथा नांदेड शहर काँग्रेस कमिटीच्या वतीने आमरण उपोषण छेडण्यात येईल, असा इशारा देण्यात आला आहे.
या प्रसंगी माजी उपमहापौर अब्दुल गफार, माजी नगरसेवक सय्यद शेर अली, हबीब बागवान, अब्दुल अजीज कुरेशी, अब्दुल फहीम, अब्दुल रहीम, रमेश गोडबोले, अब्दुल लतीफ, मोहम्मद नासेर, बाबू भाई खोकेवाला, सय्यद फसी, अब्दुल मुख्तार उर्फ बल्लू सेठ, सय्यद शोएब, अब्दुल वहाब आदी पदाधिकारी उपस्थित होते.
