कॅनडात पंजाबच्या उद्योगपतीची गोळ्या झाडून हत्या; लॉरेन्स बिश्नोई टोळीने घेतली जबाबदारी
लॉरेन्स बिश्नोई टोळीशी संबंधित गुन्हेगार गोल्डी ढिल्लोण याने सोशल मीडियावर पोस्ट करून प्रसिद्ध उद्योगपती दर्शन सिंग साहसी यांच्या हत्येची जबाबदारी स्वीकारली आहे.
कॅनडातील ऍबॉट्सफोर्ड शहरात पंजाबमधील प्रसिद्ध उद्योगपती दर्शन सिंग यांची त्यांच्या घराबाहेर गोळ्या झाडून हत्या करण्यात आली. ही घटना त्या वेळी घडली, जेव्हा दर्शन सिंग घरातून बाहेर पडत होते. दर्शन सिंग वस्त्र पुनर्वापर (टेक्सटाइल रीसायकलिंग) व्यवसायाशी संबंधित होते आणि त्यांच्या कारखान्यात शेकडो कर्मचारी काम करत होते.
घटनेची माहिती मिळताच कॅनडा पोलिसांनी तात्काळ घटनास्थळी धाव घेतली आणि तपास सुरू केला. हा प्रकार खंडणीच्या अंगानेही तपासला जात आहे. प्राथमिक माहितीनुसार, दर्शन सिंग यांना काही काळापासून खंडणीच्या धमक्या येत होत्या, मात्र त्यांनी त्या गंभीरतेने घेतल्या नाहीत.
मिळालेल्या वृत्तानुसार, दर्शन सिंग हे मूळचे पंजाबमधील लुधियाण्याजवळच्या दोराहा परिसरातील रहिवासी होते. काही वर्षांपूर्वी ते कॅनडात स्थलांतरित झाले होते आणि आपल्या मेहनतीच्या जोरावर त्यांनी मोठे यश मिळवले. भारतीय समुदायात ते एक आदरणीय व्यक्ती म्हणून ओळखले जात होते आणि सामाजिक तसेच परोपकारी कामात सक्रिय भूमिका बजावत होते. तथापि, कॅनडा पोलिसांनी सध्या तरी या हत्येमागे कोणत्याही टोळीचा किंवा खंडणी गटाचा हात असल्याचे नाकारले आहे. पोलिसांचे म्हणणे आहे की, कुटुंबीयांनीही अशा शंकेचा उल्लेख केलेला नाही.
दरम्यान, लॉरेन्स बिश्नोई टोळीशी संबंधित गुन्हेगार गोल्डी ढिल्लोण याने सोशल मीडियावर पोस्ट करून दर्शन सिंग साहसी यांच्या हत्येची जबाबदारी स्वीकारली आहे. त्या पोस्टमध्ये टोळीने दावा केला आहे की त्यांनी दर्शन सिंग यांच्याकडून त्यांच्या मोठ्या व्यवसायाच्या बदल्यात पैसे मागितले होते. मात्र दर्शन सिंग यांनी पैसे देण्यास नकार देऊन त्यांचा संपर्क क्रमांक ब्लॉक केला, त्यामुळे गँगने हा टोकाचा निर्णय घेतला.
या सनसनाटी हत्याकांडामुळे कॅनडातील पोलिस विभागात खळबळ उडाली असून स्थानिक भारतीय समुदायातही भीतीचे वातावरण निर्माण झाले आहे. तथापि, कॅनडा पोलिसांनी हा गुन्हा लवकरच उकलून दोषींना अटक करण्याचे आश्वासन दिले आहे.
