गोळी झाडून व दगडाने ठेचून २५ वर्षीय तरुणाची निर्घृण हत्या

नांदेड शहरात गुन्हेगारीचे सत्र वाढत असतानाच जुन्या परिसरातील पहीलवान टी हाउस जवळ गुरुवार संध्यकाळी घडलेल्या एका थरारक हत्याकांडाने संपूर्ण परिसरात खळबळ उडाली आहे. जुना गंज भागातील ‘पहीलवान टी हाऊस’च्या मागील बाजूस दोन गुन्हेगारी प्रवृत्तीच्या तरुणांमध्ये झालेल्या वादाचा शेवट एका तरुणाच्या हत्येत झाला.

मृत तरुणाची ओळख सक्षम ताटे (वय २५) अशी झाली असून, आरोपी हिमेश ममीडवार व त्याच्या साथीदाराने त्याच्यावर थेट हल्ला चढवून छातीत गोळी झाडली आणि दगडाने ठेचून हत्या केली, अशी माहिती विश्वसनीय पोलिस सूत्रांकडून मिळाली आहे.

मैत्रीचे रूपांतर वैर्यात
सक्षम ताटे आणि आरोपी हिमेश ममीडवार हे दोघेही पूर्वी अतिशय चांगले मित्र असल्याचे स्थानिकांच्या आणि पोलिस तपासाच्या प्राथमिक माहितीवरून स्पष्ट झाले आहे. मात्र काही काळापासून प्रेमसंबंधाच्या कारणावरून दोघांमध्ये मतभेद निर्माण झाले होते. या मतभेदांची मालिका वाढत जाऊन ती हिंसक वळणावर पोहोचली आणि अखेर सक्षमचा बळी गेला.

हल्ला पूर्वनियोजित असल्याची शक्यता
पोलिस सूत्रांच्या मते, आरोपी हिमेश आणि त्याचा साथीदार हे दोघेही जुन्या परिसरातील गुन्हेगारी कामांमध्ये सक्रिय होते. सक्षमशी मागील काही दिवसांपासून चालू असलेल्या वादाचा शेवट करण्यासाठी पूर्वनियोजितपणे ही हत्या केली असल्याची शक्यता तपासात व्यक्त केली जात आहे.

घटनास्थळ रक्ताने माखले
घटना घडली ते ठिकाण — चहाच्या दुकानाच्या मागील बाजूला अंधारा आणि ओसाड परिसर — पोलिस पथकाने तपासताना रक्ताचे डाग, गोळीचा कवच आणि दगडावरील रक्ताचे ठसे जप्त केले. यावरून हल्ला अत्यंत जवळून व निर्दयीपणे करण्यात आल्याचे स्पष्ट झाले आहे.

आरोपींचा फरार पळ
हत्येनंतर आरोपी हिमेश ममीडवार आणि त्याचा साथीदार घटनास्थळावरून फरार झाले असूनत्यांच्या शोधासाठी अनेक पथके रवाना करण्यात आली आहेत. परिसरातील सीसीटीव्ही फुटेज, मोबाईल लोकेशन आणि गुन्हेगारी नेटवर्कची माहिती यांच्या आधारे आरोपींच्या शोधाला गती देण्यात आली आहे.

पोलिसांची पुढील तपासासाठी धावपळ
दारुड्या व मोकाट तरुणांचे वाढते प्रमाण, जुन्या परिसरातील अनधिकृत बांधकामे आणि चहाच्या खोलींच्या आड चालणाऱ्या गैरप्रकारांमुळे आधीच पोलीस प्रशासनावर प्रश्नचिन्ह उपस्थित होत होते. या घटनेनंतर या भागात टेहळणी वाढवण्याचा निर्णय पोलिसांनी घेतला आहे.

या प्रकरणी गुन्हा दाखल करून पुढील तपास स्थानिक गुन्हे शाखा आणि इतवारा पोलिस ठाणे संयुक्तरीत्या करीत आहेत. शहरात वाढत्या गुन्हेगारी प्रवृत्तीला आळा घालण्यासाठी पोलिसांची कडक भूमिका आवश्यक असल्याची मागणी नागरिकांकडून होत आहे.