लोहा नगरपरिषद निवडणुकीत मतदान प्रक्रियेची जिल्हाधिकाऱ्यांकडून सखोल पाहणी

लोहा: लोहा नगरपरिषद निवडणुकीचा पहिला टप्पा उत्साहात आणि शांततेत पार पडत असताना जिल्हाधिकारी राहूल कर्डीले यांनी लोहा शहरातील विविध मतदान केंद्रांची पाहणी करीत निवडणूक प्रक्रियेचा आढावा घेतला. मतदान सुरळीत, सुरक्षित आणि विनाअडथळा पार पाडण्यासाठी प्रशासनाकडून कडक सुरक्षा व्यवस्था तैनात करण्यात आली आहे.

जिल्हाधिकारी कर्डीले यांनी सोमवारी कै. विश्वनाथराव नळगे महाविद्यालयात स्थापन करण्यात आलेल्या मतदान केंद्राला भेट देत मतदानाची प्रत्यक्ष प्रक्रिया तपासली.
मतदारांची ओळख पडताळणी, रांगेचे नियोजन, सुरक्षा व्यवस्था, ईव्हीएम आणि व्हीव्हीपॅटची कार्यप्रणाली या सर्व बाबींची त्यांनी पाहणी करून आवश्यक त्या सूचना दिल्या.

त्यांच्यासोबत तहसीलदार विठ्ठल परळीकर, नायब तहसीलदार अशोक मोकळे, नगरपरिषदेचे मुख्याधिकारी श्रीकांत लाळगे, निवडणूक शाखेचे कर्मचारी आणि स्थानिक प्रशासनातील अधिकारी उपस्थित होते. जिल्हाधिकाऱ्यांनी मतदान केंद्रावर आलेल्या मतदारांशीही संवाद साधत कोणतीही अडचण भासत नसल्याची खात्री करून घेतली. प्रशासनाने वेळोवेळी जनजागृती मोहिमा राबवल्याने मतदानाला चांगला प्रतिसाद मिळत असल्याचे चित्र दिवसभर दिसून आले.

महाबळे परिवाराने एकत्रित येऊन बजावला मताधिकार
लोकशाहीच्या सर्वात महत्त्वाच्या पर्वामध्ये लोह्यातील महाबळे परिवाराने एकजुटीचा व लोकशाहीप्रति असलेल्या बांधिलकीचा आदर्श ठेवला. कुटुंबातील सर्व मतदारांनी एकत्रितपणे मतदान केंद्रावर उपस्थित राहून मतदानाचा हक्क बजावला.

कुटुंबातील ज्येष्ठ सदस्यांपासून ते नवतरुणांपर्यंत सर्वांनी मतदार यादीनुसार आपले मतदान नोंदवले. समाजात जागरूक नागरिकत्वाचा संदेश देणारी त्यांची ही उपस्थिती विशेष ठरली.

मतदान केंद्रावर पोहोचलेल्या महाबळे परिवारातील सदस्यांनी शांततेत आणि शिस्तबद्धपणे मतदान पूर्ण केले. यामुळे परिसरातील मतदारांना प्रेरणा मिळाल्याचे स्थानिक नागरिकांनी सांगितले.

जिल्हाधिकारी व प्रशासनाच्या पाहणीनंतर मतदान केंद्रातील व्यवस्था अधिक सुटसुटीत दिसून आली. निवडणूक प्रक्रियेत कोणताही अडथळा निर्माण होऊ नये यासाठी पोलीस व निवडणूक कर्मचाऱ्यांनी दक्षता घेतली होती. छायाचित्र : विनोद महाबळे