मुदखेड तालुक्यातील जवळा मुरार गावात घडलेल्या चौघांच्या मृत्यू प्रकरणाने संपूर्ण परिसरात खळबळ उडवून दिली आहे. सुरुवातीला हे प्रकरण अपघात आणि आत्महत्येचा संशय म्हणून पाहिले जात होते. मात्र, सखोल पोलीस तपास आणि वैद्यकीय अहवालानंतर या घटनेला वेगळेच आणि धक्कादायक वळण मिळाले आहे.
उमेश आणि बजरंग लखे या दोन भावंडांनी आपले जन्मदाते आई-वडील राधाबाई लखे आणि रमेश लखे यांची गळा दाबून निर्घृण हत्या केल्याचे तपासात उघड झाले आहे. घरातच ही हत्या करण्यात आल्याचे पुरावे पोलिसांना मिळाले आहेत. घटनेनंतर दोन्ही भावंडांनी मुगट रेल्वे मार्गावर जाऊन धावत्या रेल्वेसमोर उडी घेत आत्महत्या केल्याची माहिती समोर आली आहे.
या प्रकरणात पोलिसांनी चारही मृतदेहांचे शवविच्छेदन (पोस्टमार्टेम) केल्यानंतर मृत दोन्ही भावांवर आई-वडिलांच्या हत्येचा गुन्हा दाखल केला आहे. वैद्यकीय अहवालात राधाबाई आणि रमेश लखे यांचा मृत्यू गळा दाबल्यामुळे झाल्याचे स्पष्ट झाले आहे.
पोलिस तपासात असेही निष्पन्न झाले आहे की, कुटुंबावर दीर्घकाळापासून आर्थिक विवंचना होत्या. कर्ज, उत्पन्नाचा अभाव आणि घरातील तणाव यामुळे भावंडे मानसिक दबावाखाली होती. याच आर्थिक अडचणींमधून ही टोकाची आणि दुर्दैवी घटना घडल्याचा प्राथमिक निष्कर्ष पोलिसांनी काढला आहे.
या घटनेमुळे जवळा मुरार गावासह संपूर्ण मुदखेड तालुक्यात शोककळा पसरली असून, कुटुंबीय, नातेवाईक आणि ग्रामस्थांमध्ये हळहळ व्यक्त केली जात आहे. पोलिसांकडून पुढील तपास सुरू असून, या प्रकरणातील सर्व पैलूंचा बारकाईने शोध घेतला जात आहे.
