प्रतिनिधी / संविधानाने दिलेल्या अधिकारांचा वापर करत आपल्या रास्त मागण्यांसाठी बँक कर्मचारी उद्या रस्त्यावर उतरणार आहेत. गेली सुमारे दहा वर्षे प्रलंबित असलेली आठवड्यातील 5 दिवस कामकाज (5 Day Week) ही प्रमुख मागणी अजूनही पूर्ण झालेली नसल्याने बँक कर्मचारी संघटनांनी संप व आंदोलनाचा मार्ग स्वीकारला आहे.
ही केवळ कामकाज पद्धतीतील बदलाची मागणी नसून कर्मचाऱ्यांच्या हक्क, अस्मिता आणि जीवनमानाशी निगडित प्रश्न असल्याचे संघटनांच्या पदाधिकाऱ्यांनी स्पष्ट केले. विशेष म्हणजे, येत्या 31 जानेवारी रोजी सेवानिवृत्त होणारे काही वरिष्ठ कॉम्रेड्सही या संपात सहभागी होणार असून, त्यांना वैयक्तिक फायदा होणार नसतानाही इतर सहकाऱ्यांच्या भविष्यासाठी ते आंदोलनात उतरले आहेत. यामुळे कर्मचाऱ्यांमधील एकतेचे दर्शन घडत असल्याचे संघटनांकडून सांगण्यात आले.
संघटनांच्या मते, यापूर्वीही एकजुटीच्या बळावर अनेक मागण्या मान्य करून घेण्यात आल्या आहेत आणि यावेळीही एकत्रित लढ्यामुळे यश मिळेल, असा विश्वास व्यक्त केला जात आहे. उद्याच्या आंदोलनात डिजिटल सेवा ते प्रत्यक्ष शाखा व्यवहारांपर्यंत देशभरातील बँकिंग कामकाजावर परिणाम होण्याची शक्यता वर्तवली जात आहे.
आंदोलनादरम्यान कर्मचाऱ्यांकडून घोषणाबाजी केली जाणार असून
“उद्या फक्त एकच नारा – 5 डे वीक अधिकार हमारा”
अशी घोषणा देण्यात येणार आहे.
या आंदोलनाला UFBU, SBI Staff Federation आणि SBI Staff Union यांसह विविध कर्मचारी संघटनांचे समर्थन असल्याचे सांगण्यात आले.
दरम्यान, ग्राहकांनी आवश्यक बँकिंग व्यवहार आगाऊ पूर्ण करून घ्यावेत, असे आवाहनही करण्यात येत आहे.
