दक्षिण मध्य रेल्वेच्या नांदेड विभागात ०९ मार्च २०२६ रोजी आंतरराष्ट्रीय महिला दिन उत्साहात साजरा करण्यात आला. विभागात कार्यरत महिला कर्मचाऱ्यांच्या महत्त्वपूर्ण योगदानाची दखल घेऊन त्यांना प्रोत्साहन देण्यासाठी या कार्यक्रमाचे आयोजन करण्यात आले होते.
या कार्यक्रमास नांदेड विभागाचे विभागीय रेल्वे व्यवस्थापक श्री प्रदीप कमले प्रमुख पाहुणे म्हणून उपस्थित होते. आपल्या भाषणात त्यांनी इतिहासातील तसेच समाजातील विविध क्षेत्रांमध्ये महिलांची महत्त्वपूर्ण भूमिका अधोरेखित केली. भारतीय रेल्वेमध्ये कार्यरत महिला कर्मचाऱ्यांच्या समर्पण, कर्तव्यनिष्ठा आणि परिश्रमांचे त्यांनी कौतुक केले. महिलांनी विविध जबाबदाऱ्या सक्षमपणे सांभाळत रेल्वेच्या प्रगतीत मोठे योगदान दिले असल्याचे त्यांनी सांगितले आणि त्यांना आत्मविश्वासाने पुढे वाटचाल करण्याचे आवाहन केले.
कार्यक्रमाची सुरुवात महिला कर्मचाऱ्यांनी सादर केलेल्या गीत आणि काव्य सादरीकरणाने झाली. या सादरीकरणामुळे कार्यक्रमाला उत्साही आणि आनंददायी वातावरण लाभले. सहभागी महिलांच्या कलागुणांचे उपस्थितांनी मनापासून कौतुक केले.
कार्यक्रमाचे प्रास्ताविक व स्वागतपर भाषण सौ. रसना देवी, डीपीओ (कोऑर्डिनेशन) यांनी केले. त्यांनी प्रमुख पाहुणे तसेच उपस्थित अधिकारी व कर्मचाऱ्यांचे स्वागत केले आणि महिला दिनानिमित्त आयोजित करण्यात आलेल्या विविध उपक्रमांची माहिती दिली.
अतिरिक्त विभागीय रेल्वे व्यवस्थापक श्री च. कल्याण राजू यांनी आपल्या मनोगतात महिला कर्मचाऱ्यांच्या कार्यतत्परतेचे व यशाचे कौतुक केले. रेल्वेच्या विविध विभागांमध्ये महिलांची वाढती भूमिका अत्यंत महत्त्वाची असल्याचे त्यांनी नमूद केले आणि महिलांना यापुढेही त्याच उत्साहाने कार्य करण्यासाठी प्रेरित केले.
डॉ. मनीषा दुधमळे, वरिष्ठ विभागीय वैद्यकीय अधिकारी/नांदेड यांनीही उपस्थितांना मार्गदर्शन केले. त्यांनी महिला सशक्तीकरण, आरोग्याबाबत जागरूकता आणि व्यावसायिक जबाबदाऱ्या व वैयक्तिक आयुष्यात संतुलन राखण्याचे महत्त्व यावर आपले विचार मांडले.
या कार्यक्रमात नांदेड विभागातील विविध शाखांमधील महिला कर्मचाऱ्यांचा उत्स्फूर्त आणि सक्रिय सहभाग पाहायला मिळाला. महिलांच्या कार्याचा गौरव करण्याबरोबरच अनुभवांची देवाणघेवाण आणि परस्पर प्रेरणा देण्याचे हे एक प्रभावी व्यासपीठ ठरले.
कार्यक्रमाच्या शेवटी सौ. चामुंडेश्वरी, पीएस/गॅझ. टू डीआरएम/नांदेड यांनी उपस्थित मान्यवरांचे, अधिकारी व सहभागींचे आभार मानत आभार प्रदर्शन केले.
या कार्यक्रमातून दक्षिण मध्य रेल्वेच्या नांदेड विभागाची महिला सक्षमीकरण, लिंग समानता आणि महिला कर्मचाऱ्यांच्या योगदानाचा सन्मान करण्याबाबतची बांधिलकी अधोरेखित झाली.
