बाबा पेट्रोल पंप येथे दुर्दैवी अपघात; ३ वर्षीय चिमुकल्याचा जागीच मृत्यू

नांदेड : शहरातील बाबा पेट्रोल पंप परिसरात काल सायंकाळी एक अत्यंत दुर्दैवी अपघात घडला. या अपघातात अवघ्या तीन वर्षांच्या चिमुकल्याचा जागीच मृत्यू झाल्याने परिसरात हळहळ व्यक्त केली जात आहे.

मिळालेल्या माहितीनुसार, शेख शियान शेख वाजिद (वय ३ वर्षे) असे मृत बालकाचे नाव असून तो झमझम कॉलनी, दर्गा रोड, परभणी येथील रहिवासी होता. त्याचे वडील शेख वाजिद हे व्यवसायाने मिस्त्री (कारागीर) असल्याचे सांगण्यात आले. शेख शियान हा आपल्या नानीकडे (आजीकडे) नवी आबादी, नांदेड येथे आला होता.

दरम्यान, काल सायंकाळी बाबा पेट्रोल पंपावर पेट्रोल भरून एक कार बाहेर पडत असताना हा दुर्दैवी अपघात घडला. कारच्या पुढील चाकाखाली आल्याने शेख शियान गंभीर जखमी झाला आणि त्याचा जागीच मृत्यू झाला.

सदर कार ही नांदेडमधील प्रसिद्ध व नामांकित इक़रा स्कूलच्या संचालकांची असल्याची माहिती समोर आली आहे. अपघाताच्या वेळी ते स्वतः वाहन चालवत होते, असेही सांगण्यात येत आहे.

अपघातानंतर बालकाला तत्काळ शासकीय रुग्णालयात नेण्यात आले. मात्र डॉक्टरांनी तपासणीअंती त्याला मृत घोषित केले. त्यानंतर मृतदेह शवविच्छेदनासाठी (पोस्टमार्टम) शासकीय रुग्णालयात पाठविण्यात आला.

या हृदयद्रावक घटनेमुळे कुटुंबावर दुःखाचा डोंगर कोसळला असून परिसरात शोककळा पसरली आहे. दरम्यान, इतवारा पोलीस या प्रकरणाचा अधिक तपास करीत असून अपघाताच्या सर्व बाजूंची चौकशी सुरू आहे.