महापालिकेतील निधीवाटपावरून विरोधकांचा आरोप

छत्रपती संभाजीनगर | प्रतिनिधी : मोहम्मद दानिश बेग
छत्रपती संभाजीनगर महापालिकेतील विकासकामांच्या निधीवाटपावरून राजकीय वाद निर्माण झाला आहे. विरोधी पक्षनेते समीर साजिद बिल्डर यांनी सत्ताधाऱ्यांकडून निधीवाटपात भेदभाव होत असल्याचा आरोप केला आहे.

एमआयएमच्या नगरसेवकांच्या प्रभागांना तुलनेने कमी निधी मिळत असल्याचा दावा बिल्डर यांनी केला असून, सर्व नगरसेवकांना पक्षभेद न करता समान पद्धतीने विकासनिधी उपलब्ध करून द्यावा, अशी मागणी त्यांनी केली आहे.

या प्रकरणी बिल्डर यांनी मुख्यमंत्री देवेंद्र फडणवीस यांची भेट घेऊन निवेदन दिले. निधीवाटपाबरोबरच महापालिकेच्या विविध आर्थिक व्यवहारांची चौकशी करण्याची मागणीही त्यांनी मुख्यमंत्र्यांकडे केली आहे.

महापालिकेतील बाह्यस्त्रोत कर्मचाऱ्यांच्या एजन्सींना कथितरीत्या झालेल्या सुमारे २२ कोटी रुपयांच्या अतिरिक्त भुगतानाची चौकशी करावी, अशी मागणीही निवेदनात करण्यात आली आहे. मात्र हे आरोप असून त्याबाबत स्वतंत्र अधिकृत चौकशीचा निष्कर्ष अद्याप समोर आलेला नाही.

दरम्यान, शहरातील रखडलेली रस्त्यांची कामे, विमानतळ ते पडेगाव-मिटमिटा मार्गावरील प्रलंबित कामे आणि इतर विकासकामांसाठी निधी उपलब्ध करून द्यावा, अशी मागणीही करण्यात आली आहे. या तक्रारींवर मुख्यमंत्री काय निर्णय घेतात, याकडे आता शहराचे लक्ष लागले आहे.