उत्तर प्रदेशचे मुलगे, तामिळनाडूच्या मुली राष्ट्रीय युवा बास्केटबॉलचे विजेते

पुणे, दि. ३ नोव्हेंबर : उत्तर प्रदेशच्या मुलांच्या संघाने आणि तामिळनाडूच्या मुलींच्या संघाने दमदार कामगिरी करत १६ वर्षांखालील गटातील ४१ व्या सीएम चषक राष्ट्रीय युवा बास्केटबॉल स्पर्धेचे विजेतेपद पटकावले. मंगळवारी स्पर्धेच्या आठव्या व अंतिम दिवशी झालेल्या अंतिम सामन्यांमध्ये उत्तर प्रदेशने मध्य प्रदेशचा ७६-७१ असा पराभव केला, तर तामिळनाडूने कर्नाटकवर ८०-६५ अशी मात करत मुलींच्या गटात विजेतेपद मिळवले.

मुलांच्या अंतिम सामन्यात उत्तर प्रदेशने सुरुवातीपासून आघाडी घेत विजयावर शिक्कामोर्तब केले. उत्तर प्रदेशकडून दर्शील सिंग याने सर्वाधिक २४ गुणांची नोंद केली. मध्य प्रदेशकडून प्रशांत सिंग याने सामन्यात सर्वाधिक २६ गुण मिळवूनही संघाला विजय मिळवून देता आला नाही. सामन्यातील चार सत्रांचे गुण अनुक्रमे २४-१४, १४-१९, १२-२६ आणि २६-१२ असे राहिले.

मुलींच्या अंतिम सामन्यात तामिळनाडूने सुरुवातीपासूनच वर्चस्व राखत कर्नाटकला ८०-६५ असे पराभूत केले. तामिळनाडूकडून नक्षत्रा के हिने २५ गुणांची शानदार खेळी केली. तर कर्नाटककडून आंचल सिरवी हिने २२ गुण मिळवले.

दरम्यान, कांस्यपदकाच्या सामन्यांमध्ये केरळने महाराष्ट्राच्या मुलींच्या संघाचा ७४-४२ असा पराभव केला. तर मुलांच्या गटात राजस्थानने तामिळनाडूवर ९०-६९ असा दणदणीत विजय मिळवला.

स्पर्धेच्या समारोपप्रसंगी महाराष्ट्राचे मुख्यमंत्री देवेंद्र फडणवीस यांच्या हस्ते विजेत्या व उपविजेत्या संघांना पारितोषिकांचे वितरण करण्यात आले. महाराष्ट्र राज्य बास्केटबॉल संघटनेचे अध्यक्ष संदीप जोशी कार्यक्रमाच्या अध्यक्षस्थानी होते. यावेळी भारतीय बास्केटबॉल महासंघाचे सचिव कुलविंदर सिंग गिल, खजिनदार टी. चेंगलराया, महाराष्ट्र राज्य बास्केटबॉल संघटनेचे उपाध्यक्ष विक्रांत पाटील आदी मान्यवर उपस्थित होते.

महाराष्ट्र राज्य बास्केटबॉल संघटनेचे सचिव गोविंद कृष्ण मुथुकुमार यांनी आभार प्रदर्शन केले. आठ दिवस चाललेल्या या राष्ट्रीय स्पर्धेची उत्साहपूर्ण वातावरणात सांगता झाली.