नांदेड: दिवाळीच्या सुट्या संपल्याने शिक्षणासाठी परत पुणे येथे जाण्याच्या तयारीत असलेल्या एका महाविद्यालयीन विद्यार्थ्यावर काळाने घाला घातला. एकादशीनिमित्त पूजेसाठी घराच्या छतावर फुले तोडत असताना विद्युत तारेचा अचानक स्पर्श झाल्याने महाविद्यालयीन विद्यार्थ्यांचा जागीच मृत्यू झाला. जिल्ह्यातील देगलूर शहरातील अंबिकानगर मध्ये गुरुवारी सकाळी ही दुर्देवी घटना घडली. तेजस वसंत ढगे (वय २२) असं मयत विद्यार्थ्यांच नाव आहे. या घटनेने हळहळ व्यक्त होतं आहे.
मयत तेजस ढगे हा पुण्याच्या गरवारे कॉमर्स महाविद्यालयात बी.बी.ए.च्या अंतिम वर्षात शिक्षण घेत होता. दीपावली सणानिमित्त तेजस हा देगलूर येथे आपल्या गावी आला होता. कुटुंबियांसोबत त्याने दिवाळी साजरी देखील केली. दिवाळीच्या सुट्या संपल्याने तो पुणे येथे जाण्याची तयारी करत होता. त्याने तिकीट देखील काढले होते. गुरुवारी २३ नोव्हेंबर रोजी सायंकाळी ट्रॅव्हल्सने पुण्याला जाणार होता. कार्तिकी एकादशीच्या निमित्ताने देव पूजेसाठी फुले तोडण्यासाठी तो घराच्या छतावर गेला. लोखंडी रॉडने फुले तोडत असताना विद्युत तारेला रॉडचा स्पर्श झाला. शॉक लागल्याने तेजस हा जागीच बेशुद्ध पडला. कुटुंबियांनी त्याला तात्काळ रुग्णालयात दाखल केले, मात्र उपचारापूर्वी त्याचा मृत्यू झाला.
तेजसचे वडील वसंतराव ढगे हे शिलाई मशीन विक्रीचे व्यावसायिक आहेत. त्यांना तीन मुले आहेत. तेजस हा मोठा मुलगा होता. तो अभ्यासात अत्यंत हुशार देखील होता. बी.बी.ए.चे शिक्षण पूर्ण केल्यानंतर तो स्पर्धा परीक्षेच्या माध्यमातून पुढील ध्येय गाठण्याचे निश्चित केले होते. मात्र तत्पूर्वीच त्याला काळाने अचानकपणे हिरावून नेल्याने त्याच स्वप्न अर्धवट राहिलं. या घटनेनं कुटुंबियांवर दुःखाचा डोंगर कोसळलं आहे. गुरुवारी सायंकाळी देगलूर मध्ये त्याच्यावर अंत्यसंस्कार करण्यात आले. या घटनेने देगलूर शहरात हळहळ व्यक्त होतं आहे.
