ऑटो चालकाचा प्रामाणिकपणा: रिक्षामध्ये विसरलेले MBBS चे ओरिजिनल कागदपत्रे प्रामाणिकपणे परत केले
नांदेड (प्रतिनिधी): प्रामाणिकपणा हा आजच्या काळात दुर्मिळ होत चाललेला गुण असला तरी, अजूनही समाजामध्ये काही माणसं अशा चारित्र्याची आहेत, जी इतरांसाठी आदर्श ठरतात. असाच एक सकारात्मक आणि प्रेरणादायी अनुभव नांदेडमध्ये दिनांक 18 एप्रिल 2025, गुरुवारी घडला.
प्रकाश धुताडे (रा. बांरसगाव) हे ऑटोरिक्षा चालक आपल्या दररोजच्या प्रमाणे प्रवासी घेऊन जात होते. त्यांच्याच रिक्षामध्ये डॉ. बुशरा कच्ची आणि त्यांची सहकारी मैत्रीण विष्णुपुरी ते कोर्ट परिसर, शिवाजी महाराज पुतळा या मार्गावर प्रवास करत होत्या. मात्र कोर्टात पोहोचल्यावर त्यांना लक्षात आले की, त्यांच्या हातातील महत्त्वाची बॅग, ज्यामध्ये MBBS चे ओरिजिनल कागदपत्रे होती, ती रिक्षामध्येच विसरली गेली आहे.
या घाबरवणाऱ्या परिस्थितीत त्वरित नोटरी कार्यालयातील कर्मचारी शेख बबलू यांनी पुढाकार घेतला आणि टायगर ऑटोरिक्षा चालक संघटनेचे प्रदेशाध्यक्ष अहमद (बाबा) बागवाले यांचा मोबाईल नंबर देऊन संपर्क साधण्याचा सल्ला दिला. अध्यक्षांनी संपूर्ण माहिती समजून घेतली आणि त्यांच्या गटावर (ग्रुपवर) ही माहिती शेअर केली.
या सहकार्यामुळे अवघ्या एक तासात प्रकाश धुताडे यांच्याशी संपर्क साधण्यात आला आणि त्यांनी कोणतीही अडचण न आणता, बॅग सुरक्षित अवस्थेत विष्णुपुरी येथे डॉक्टरांच्या ताब्यात दिली.
या वेळी टायगर संघटनेचे प्रदेशाध्यक्ष अहमद (बाबा) बागवाले, रिक्षा चालक प्रकाश धुताडे, उपाध्यक्ष शेख तय्यब, मार्गदर्शक बबलू पटेल, संजय वाघमारे यांची मोलाची साथ लाभली. डॉक्टर्सची संपूर्ण टीमही त्यावेळी उपस्थित होती.
डॉ. बुशरा कच्ची यांनी कृतज्ञता व्यक्त करत 500 रुपये बक्षीस देऊन शुभेच्छा दिल्या आणि संघटनेच्या व रिक्षा चालकांच्या प्रामाणिकपणाचे मनापासून आभार मानले. हा प्रसंग नांदेडकरांसाठी एक प्रेरणा ठरतो, ज्यामध्ये माणुसकी, प्रामाणिकपणा आणि सामाजिक जबाबदारी यांचा सुंदर संगम पाहायला मिळाला.
