देगलूर नाका येथील फूट ओव्हर ब्रिज बंद – कमी वापर, अड्डेबाजांची गर्दी आणि धोकादायक स्थितीमुळे महापालिकेचा निर्णय
नांदेड – वर्ष २००८ मध्ये देगलूर नाका चैरस्त्यावर बांधण्यात आलेल्या फूट ओव्हर ब्रिजचा उद्देश नागरिकांना सुरक्षित रस्ता पार करण्याची सुविधा देणे हा होता. मात्र कालांतराने या ब्रिजचा वापर अत्यंत कमी झाला आणि त्याचा वास्तविक उद्देश हरवला.
सदर पुलाचा वापर कमी होत चालल्याने, रात्रीच्या वेळी येथे अड्डेबाज, दारू पिणारे, गांजा सेवन करणारे, जुगार खेळणारे यांचा गर्दीचा अड्डा बनला होता. इतकेच नव्हे तर महिलांवर छेडछाड व गैरप्रकाराच्या घटनाही येथे घडल्याचे समोर आले होते.
स्थानिक नागरिकांच्या तक्रारीनंतर आणि पुलाच्या धोकादायक स्थितीचा विचार करता, महानगरपालिकेने सदर फूट ओव्हर ब्रिज ‘अत्यंत धोकादायक’ असल्याचे जाहीर करत तो पूर्णतः बंद केला आहे. पुलाच्या लोखंडी व काँक्रीट रचनेत दुरुस्तीअयोग्य तडे व कमकुवतपणा दिसून आल्यामुळे मोठा अपघात होण्याची शक्यता होती.
सध्या महापालिका प्रशासन हा ब्रिज पूर्णतः पाडायचा की नव्याने दुरुस्ती करून पुन्हा सुरू करायचा, यावर विचार करत आहे.
नागरिकांकडून अशी मागणी केली जात आहे की, भविष्यात अशा पायाभूत सुविधा तयार करताना योग्य देखभाल, वेळेवर दुरुस्ती आणि वापरावर लक्ष ठेवले जावे, जेणेकरून सार्वजनिक सुरक्षेला धोका निर्माण होणार नाही आणि सरकारी निधी वाया जाणार नाही.
