दुष्काळग्रस्त २६५ तालुक्यांतील दहावी-बारावी विद्यार्थ्यांना परीक्षा शुल्कातून तात्पुरती सूट

मुंबई : महाराष्ट्र राज्य माध्यमिक व उच्च माध्यमिक शिक्षण मंडळामार्फत फेब्रुवारी-मार्च २०२७ मध्ये घेण्यात येणाऱ्या इयत्ता दहावी व बारावीच्या परीक्षेसाठी दुष्काळग्रस्त २६५ तालुक्यांतील विद्यार्थ्यांकडून सध्या परीक्षा शुल्क आकारू नये, असे निर्देश देण्यात आले आहेत.

राज्य शासनाच्या २५ सप्टेंबर २०२६ रोजीच्या शासन निर्णयानुसार राज्यातील २६५ तालुक्यांमध्ये दुष्काळजन्य परिस्थिती निर्माण झाल्याने विविध सवलती लागू करण्यात आल्या आहेत. त्यामध्ये शालेय व महाविद्यालयीन विद्यार्थ्यांच्या परीक्षा शुल्कात माफी देण्याचा निर्णय घेण्यात आला आहे.

त्यानुसार दहावी व बारावीच्या परीक्षेस प्रविष्ट होऊ इच्छिणाऱ्या विद्यार्थ्यांची आवेदनपत्रे पुढील आदेशापर्यंत परीक्षा शुल्क न घेता ऑनलाइन पद्धतीने भरून घेण्याच्या सूचना देण्यात आल्या आहेत. याबाबत राज्य मंडळाकडून लवकरच सविस्तर सूचना जारी करण्यात येणार आहेत.

दरम्यान, विभागातील दुष्काळग्रस्त तालुक्यांतील सर्व शाळा व कनिष्ठ महाविद्यालयांना याबाबत तात्काळ सूचना देऊन केलेल्या कार्यवाहीचा अहवाल राज्य मंडळाकडे सादर करण्याचे निर्देश देण्यात आले आहेत.