नाशिकरोड | प्रतिनिधी: मुलीचा वाढदिवस होता. बाप तिच्यासाठी स्वप्न गुंफत होता. मित्रांमध्ये फिरून आमंत्रण देत होता.
…पण वाढदिवसाच्या केकऐवजी शवपेटीत आला बाप!
गुरुवारी (दि. 2) रात्री नाशिकच्या जेलरोड परिसरात ‘दोस्तीच्या’ कुस्तीने भीषण रूप घेतलं आणि एका तडीपार गुंडाचा दुसऱ्या गुंडाने नृशंस खून केल्याची संतापजनक घटना घडली. मृत हितेश डोईफोडे (रा. संजय गांधी नगर) आपल्या मुलीच्या वाढदिवसाच्या तयारीत गुंतलेला असताना, मित्र रोहित बंगलासोबत एका परिचितास आमंत्रण देण्यासाठी निघाला होता. पण या निरागस कारणाने त्याला यमसदनी पोहोचवलं!
🤝 ‘मित्रांमध्ये बाचाबाची – शत्रुत्वात रूपांतर’
जेलरोडमधील बालाजीनगर येथे नीलेश पेखळेच्या घरासमोर दुचाकी उभी करताच वादावादी झाली. काही क्षणांतच पेखळेने गेटला अडकवलेल्या पिशवीतून धारदार शस्त्र बाहेर काढलं आणि हितेशच्या डोक्यात जबर वार केला. रोहितवर लोखंडी रॉडने हल्ला झाला, पण तो पळून जिवंत राहिला. मात्र, रक्तबंबाळ हितेश जीव वाचवण्यासाठी धावत सुटला, पण संशयितांनी त्याचा रस्त्यात पाठलाग करत निर्घृण खून केला.
📞 मोबाइलवरून मृत्यूच्या बातमीचा धक्का
गवतात लपून बचावलेला रोहित एका अनोळखी व्यक्तीच्या मोबाइलवरून भावाला फोन करून मदत मागितली. गंभीर जखमी रोहितला बिटको रुग्णालयात दाखल करण्यात आलं, तर संशयित पेखळे याने स्वतःच हितेशला जिल्हा शासकीय रुग्णालयात पोहोचवलं – पण उशीर झाला होता. डॉक्टरांनी मृत्यू जाहीर केला.
👮♂️ काही तासांत गुन्हेगार गजाआड
जखमी रोहितच्या जबाबावरून नीलेश पेखळे व दोन साथीदारांविरोधात खुनाचा गुन्हा दाखल करण्यात आला असून, पोलिसांनी काही तासांतच पेखळेला अटक केली. न्यायालयाने त्यास ७ दिवसांची पोलीस कोठडी सुनावली आहे.
❗एक निरागस वाढदिवस… आणि काळजाचं पान!
मुलीच्या वाढदिवसाच्या दिवशी घरात फुगे न लागता… काळं झेंडा फडकला!
केकच्या जागी धुरकट स्मृती, आणि हसऱ्या चेहऱ्याच्या जागी डोळ्यांत अश्रू…
हे केवळ गुन्हा नव्हे – ही एका कुटुंबाची अधुरी झालेली कहाणी आहे!
