नांदेड, दि. २९ ऑगस्ट –(मो. रियाज सौदागर) नांदेड शहरातील प्रभाग क्रमांक १२ हैदर बाग परिसरात आज सकाळच्या पावसामुळे नागरिकांचे हाल झाले आहेत. या प्रभागात लक्ष्मी नगर, इस्लामपुरा, बरकत पुरा व आसिफ कॉलनी** यांचा समावेश असून जोरदार पावसामुळे रस्ते, गल्ली-बोळ पाण्याखाली गेले आहेत. अनेक घरांमध्ये पाणी शिरल्याने नागरिकांना घर सोडून जाण्याची वेळ आली आहे.
स्थानिक रहिवाशांनी आरोप केला आहे की, नांदेड महानगरपालिका, देगलूर नाका परिसरातील अधिकारी, हैदर बाग पाणी टाकी विभागाचे एस. आय. यांनी अद्यापपर्यंत कोणतीही योग्य दखल घेतलेली नाही. नागरिकांच्या मते, माजी नगरसेवकांनी फक्त आश्वासन दिले असून प्रत्यक्षात काहीही कार्यवाही केलेली नाही.
गेल्या वर्षी पूरग्रस्त झालेल्या नागरिकांना देखील नांदेडमध्ये अजूनपर्यंत शासनाने मदतीचे राशन मिळालेले नाही, अशी नाराजी स्थानिकांनी व्यक्त केली.
दरम्यान, या भागात साचलेल्या पाण्यामुळे डेंगू, मलेरिया, हायजा** यांसारख्या साथीच्या रोगांचा धोका वाढला आहे. नागरिकांचे म्हणणे आहे की, योग्य वेळी उपाययोजना न केल्यास परिस्थिती अधिक बिकट होऊ शकते.
देगलूर नाका ते हैदर बाग, लक्ष्मी नगर परिसरात अजूनही कोणतीही पाहणी झालेली नाही. त्यामुळे स्थानिक नागरिकांनी महानगरपालिकेने तात्काळ लक्ष घालून पाणी उपसा, स्वच्छता व आरोग्यविषयक उपाययोजना कराव्यात, अशी मागणी केली आहे.
सिडको नांदेड परिसरात आज सकाळी झालेल्या पावसामुळे ही परिस्थिती अधिक गंभीर बनली असून, नागरिक प्रशासनाकडे मदतीची अपेक्षा करत आहेत.
