नांदेड, ६ नोव्हेंबर (प्रतिनिधी): नांदेड शहरातील देगलूर नाक्याजवळ असलेल्या मस्जिदे खुबा समोर मोठी नाली बंद झाल्यामुळे तेथून येणारे दूषित पाणी रस्त्यावर साचले आहे. या घाणपाण्यामुळे नमाज अदा करण्यासाठी येणाऱ्या मुस्लिम भावंडांना तसेच रस्त्यावरून जाणाऱ्या नागरिकांना प्रचंड गैरसोयींचा सामना करावा लागत आहे.
या समस्येकडे लक्ष वेधण्यासाठी आज माजी उपमहापौर अब्दुल गफ्फार यांच्या नेतृत्वाखाली काँग्रेस पक्षाच्या प्रतिनिधीमंडळाने महानगरपालिका आयुक्त महेश कुमार दोईफोडे यांची भेट घेऊन त्यांना निवेदन सादर केले.
निवेदनात नमूद करण्यात आले की, मस्जिदे खुबा समोर मुख्य रस्त्यावर बराच काळापासून घाणपाणी साचत आहे. नाली बंद झाल्यामुळे पाण्याचा निचरा होत नसल्याने हे पाणी रस्त्यावर वाहत आहे. हा प्रश्न सोडवण्यासाठी नालीवरील काँक्रीटचे स्लीब तोडून तिची पूर्ण स्वच्छता करणे आवश्यक आहे, ज्यामुळे पाण्याचा प्रवाह पुढे जाईल.
तसेच, भविष्यात ही समस्या पुन्हा उद्भवू नये म्हणून, नालीवर काँक्रीटऐवजी लोखंडी जाळीचे स्लीब बसवावेत, अशी मागणी करण्यात आली.
या प्रसंगी माजी नगरसेवक सय्यद शेर अली, चांद पाशा कुरेशी, अब्दुल हबीब बागवान, सय्यद फसीहुद्दीन, मुन्तजबुद्दीन आणि मस्जिद कमिटीचे जबाबदार सदस्य उपस्थित होते.
