विभागीय रेल्वे रुग्णालय, नांदेड येथे यशस्वी लॅप्रोस्कोपिक शस्त्रक्रिया – पित्ताशयातून सुमारे ८५ खडे काढण्यात डॉक्टरांना यश

दक्षिण मध्य रेल्वेच्या नांदेड विभागातील वैद्यकीय विभागाने 05 मार्च 2026 रोजी विभागीय रेल्वे रुग्णालय (DRH), नांदेड येथे यशस्वीरीत्या *लॅप्रोस्कोपिक कोलेसिस्टेक्टॉमी* शस्त्रक्रिया पार पाडली. या शस्त्रक्रियेमुळे रुग्णालयाची गुंतागुंतीच्या शस्त्रक्रिया कार्यक्षमतेने आणि काळजीपूर्वक हाताळण्याची क्षमता पुन्हा अधोरेखित झाली आहे.

रेल्वे संरक्षण दल (RPF) मधील 50 वर्षीय कर्मचाऱ्याला पित्ताशयात अनेक खडे (गॉल ब्लॅडर कॅल्क्युलाई) तसेच एपिगॅस्ट्रिक हर्निया असल्याचे निदान झाले होते. त्यामुळे दोन टप्प्यांत शस्त्रक्रिया करण्याचे नियोजन करण्यात आले. पहिल्या टप्प्यात लॅप्रोस्कोपिक पद्धतीने पित्ताशय काढण्यात आला असून, पुढील टप्प्यात हर्नियासाठी मेष रिपेअर शस्त्रक्रिया करण्यात येणार आहे.

रुग्ण लठ्ठ (obese) असल्यामुळे शस्त्रक्रियेपूर्वी वैद्यकीय पथकाने सखोल तपासणी करून सुरक्षित शस्त्रक्रिया व्यवस्थापनाची तयारी केली. शस्त्रक्रियेच्या वेळी भूल देताना अ‍ॅनेस्थेशिया विभागास श्वासनलिका सुरक्षित करण्यामध्ये अपेक्षित आव्हाने आली. तसेच शस्त्रक्रियेच्या प्रक्रियेत शल्यचिकित्सकांनाही काही तांत्रिक अडचणींचा सामना करावा लागला. मात्र तज्ज्ञता आणि समन्वयाच्या बळावर वैद्यकीय पथकाने सर्व आव्हाने यशस्वीपणे हाताळली.

शस्त्रक्रियेदरम्यान डॉक्टरांना पित्ताशयामध्ये अपेक्षेपेक्षा खूप मोठ्या प्रमाणात खडे आढळले. *पित्ताशयातून सुमारे ८५ खडे यशस्वीरित्या काढण्यात आले.*

ही शस्त्रक्रिया *डॉ. बी. श्रीनिवास नाईक, वरिष्ठ विभागीय वैद्यकीय अधिकारी (अ‍ॅनेस्थेसियोलॉजी), नांदेड* आणि *डॉ. अमोल चौव्हरे, सल्लागार जनरल सर्जन (केस-टू-केस आधारावर)* यांच्या तज्ज्ञ मार्गदर्शनाखाली पार पडली.

सध्या रुग्णाची प्रकृती स्थिर असून तो विभागीय रेल्वे रुग्णालय, नांदेड येथे शस्त्रक्रियेनंतरच्या निरीक्षणाखाली चांगल्या प्रकारे बरा होत आहे.

ही यशस्वी शस्त्रक्रिया दक्षिण मध्य रेल्वेच्या वैद्यकीय विभागाची समर्पित सेवा, कौशल्य आणि तयारी दर्शविते तसेच रेल्वे कर्मचारी आणि त्यांच्या कुटुंबीयांना दर्जेदार आरोग्य सेवा देण्याच्या वचनबद्धतेची पुन:प्रचिती देते.