अल्पसंख्यांक समाजाची सईद भैया खान यांच्या विधानपरिषदेवर नियुक्तीची मागणी

नांदेड (प्रतिनिधी) – महाराष्ट्रातील अल्पसंख्यांक समाजाच्या वतीने उपमुख्यमंत्री Eknath Shinde यांच्याकडे महत्त्वाची मागणी करण्यात आली आहे. शिवसेना अल्पसंख्याक विभागाचे प्रदेशाध्यक्ष Saeed Bhaiya Khan यांची विधानपरिषदेवर आमदार म्हणून नियुक्ती करावी, अशी आग्रही विनंती करण्यात आली आहे.

अल्पसंख्यांक समाजाचे प्रतिनिधी अनवर अहेमद यांनी प्रसिद्धीस दिलेल्या निवेदनात म्हटले आहे की, सईद भैया खान यांनी सातत्याने समाजातील विविध प्रश्न प्रभावीपणे मांडले असून तळागाळातील नागरिकांपर्यंत शिवसेनेचे विचार पोहोचवण्यासाठी उल्लेखनीय कार्य केले आहे. त्यांच्या या कामाची दखल घेऊन त्यांना विधानपरिषदेवर संधी दिल्यास अल्पसंख्यांक समाजात सकारात्मक संदेश जाईल, असा विश्वास व्यक्त करण्यात आला आहे.

तसेच, या निर्णयामुळे महायुतीची ताकद अधिक भक्कम होईल आणि सर्वसमावेशक विकासाच्या धोरणाला चालना मिळेल, असेही निवेदनात नमूद करण्यात आले आहे. उपमुख्यमंत्री एकनाथ शिंदे यांनी या मागणीचा सकारात्मक विचार करावा, अशी अपेक्षा व्यक्त करण्यात आली आहे.