नांदेड शहरात मोठ्या पाईप लाईन फुटल्याने पाणीटंचाई

नांदेड (प्रतिनिधी): जुन्या नांदेड शहरातील चौपाळा भाग, भाळेश्वर नगर, प्रीती नगर, ज्ञानेश्वर मंदिर परिसर, मनंतवाडी, पंचशील नगर या परिसरात गेल्या दोन दिवसांपासून गंभीर पाणीटंचाईचा सामना करावा लागत आहे. शहराच्या मुख्य जलवाहिनीतील मोठी पाईप लाईन तुटल्याने या भागांतील पाणीपुरवठा पूर्णपणे कोलमडून पडला आहे. त्यामुळे नागरिकांना पिण्यासाठी स्वच्छ पाणी मिळणेही कठीण झाले असून महिलांना, लहान मुलांना व ज्येष्ठांना मोठा त्रास सहन करावा लागत आहे.

नागरिकांची गैरसोय

पाणीटंचाईमुळे नागरिकांना विहिरी, बोअरवेल किंवा टँकर यावर अवलंबून राहावे लागत आहे. मात्र, खाजगी टँकरवाल्यांनी दर वाढवले असल्याने सर्वसामान्य माणसाचे बजेट कोलमडले आहे. काही ठिकाणी तर पाण्यासाठी रांगा लागल्याचे चित्र पाहायला मिळत आहे. महिलांना पहाटेपासूनच पाण्यासाठी भटकंती करावी लागत असून शाळकरी मुलांवरही त्याचा परिणाम झाला आहे.

कार्यकर्त्यांचा पुढाकार

या गंभीर परिस्थितीची दखल घेत शिवसेना उपजिल्हा संघटक व प्रभाग क्रमांक १३ चे निरीक्षक गजानन साहेबराव हारकरे यांनी तातडीने पुढाकार घेतला. त्यांनी आपल्या सहकाऱ्यांसह नागरिकांपर्यंत पाणी टँकरच्या माध्यमातून पोचवले. या वेळी संगत साहेब गुरुद्वाराचे पुजारी सुरजितसिंग महाराज, कैलास पवार, विकास चव्हाण, भिसे पाटील आदी कार्यकर्तेही उपस्थित होते. नागरिकांना दिलासा मिळावा यासाठी दिवसभर टँकरद्वारे पाणीपुरवठा करण्यात आला.

नगरसेवक कुठे आहेत?

दरम्यान, या भागातील नागरिकांनी तीव्र नाराजी व्यक्त केली आहे. निवडणुकीच्या काळात मतदारांना भेटायला त्यांच्या दारोदारी येणारे नगरसेवक आज मात्र दिसत नसल्याची खंत लोकांनी व्यक्त केली. “पूरग्रस्त भागातील मदत असो वा पिण्याच्या पाण्याची समस्या – जनतेच्या खऱ्या अडचणींमध्ये आमदार-नगरसेवक दिसतच नाहीत. मग अशा लोकांना मत का द्यावे?” असा सवाल नागरिक करत आहेत.

तातडीने उपाययोजना करण्याची मागणी पाणीटंचाई तातडीने सोडवण्यासाठी महापालिकेने युद्धपातळीवर काम करावे, पाईप लाईन दुरुस्त करून जलपुरवठा लवकर सुरू करावा, अशी मागणी नागरिकांकडून होत आहे. अन्यथा आंदोलनाचा इशारा देण्यात आला आहे.