नांदेड प्रतिनिधी / नांदेड शहरातील प्रभाग क्र. 11 मधील रस्त्याच्या कामावरून नागरिकांनी ठाम भूमिका घेतली असून, मुजाहेद चौक ते मिल्लत नगर, अब्बासी मशिद या मार्गावर डांबरी रस्त्याऐवजी सिमेंट काँक्रीट (सि.सि.) रस्ता करण्यात यावा, अशी जोरदार मागणी पुढे आली आहे. या मागणीमुळे स्थानिक पातळीवर हा विषय चर्चेचा ठरला आहे.
मिळालेल्या माहितीनुसार, खालेद किराणा ते मुजाहेद चौक या दरम्यान आधीच सिमेंट काँक्रीट रस्ता तयार करण्यात आला आहे. त्यामुळे या भागातील नागरिकांना चांगली आणि टिकाऊ सुविधा मिळाली आहे. मात्र पुढील टप्प्यातील मुजाहेद चौक ते मिल्लत नगर, अब्बासी मशिद या मार्गावर सध्या डांबरी रस्ता टाकण्याचे काम सुरू असल्याचे समोर आले आहे. यालाच स्थानिक नागरिकांनी विरोध दर्शवला आहे.
नागरिकांच्या म्हणण्यानुसार, हा रस्ता अत्यंत वर्दळीचा असून येथे मोठ्या प्रमाणात हायवा, टिप्पर, ट्रॅक्टर आणि इतर अवजड वाहने सतत ये-जा करतात. परिसरात मोठ्या प्रमाणावर बांधकामे सुरू असल्याने वाळू, खडी, सिमेंट व इतर जड बांधकाम साहित्य वाहून नेणारी वाहने या रस्त्यावरूनच जातात. अशा परिस्थितीत डांबरी रस्ता लवकर खराब होण्याची शक्यता असल्याचे नागरिकांचे मत आहे.
स्थानिकांनी सांगितले की, डांबरी रस्ता खराब झाल्यास खड्डे पडणे, पावसाळ्यात पाणी साचणे, वाहतूक कोंडी आणि अपघातांची शक्यता वाढते. यामुळे नागरिकांना दैनंदिन हालअपेष्टा सहन कराव्या लागतात. त्याऐवजी सिमेंट काँक्रीट रस्ता अधिक मजबूत, टिकाऊ आणि दीर्घकाळ वापरात राहणारा असल्यामुळे भविष्यातील त्रास टाळता येईल, असेही त्यांनी नमूद केले.
नांदेड शहरातील अनेक मुख्य व उपमार्गांवर सध्या सि.सि. रस्त्यांची कामे सुरू आहेत किंवा पूर्ण झाली आहेत. त्यामुळे समान सुविधा प्रभाग क्र. 11 मधील नागरिकांनाही मिळाव्यात, अशी अपेक्षा व्यक्त होत आहे. “एकाच प्रभागात अर्धा रस्ता सिमेंटचा आणि पुढचा डांबरी असणे योग्य नाही,” असेही काही नागरिकांनी सांगितले.
या संदर्भात अब्दुल रहीम पटेल, काँग्रेसचे कार्यकर्ता व सामाजिक कार्यकर्ते (प्रभाग क्र. 11, हैदरबाग, नांदेड) यांनी प्रशासनाकडे लेखी मागणी केली आहे. त्यांनी सांगितले की, नागरिकांची एकमुखी मागणी लक्षात घेऊन संबंधित अधिकाऱ्यांनी तात्काळ पाहणी करून डांबरी रस्त्याऐवजी सि.सि. रस्ता मंजूर करावा.
आता या मागणीवर प्रशासन काय निर्णय घेते, याकडे प्रभागातील नागरिकांचे लक्ष लागले आहे.
